Atyraý oblysynda jol apatynan shetel azamaty kóz jumdy
Jol-kólik oqıǵasynyń saldarynan jeńil kóliktegi ózbekstandyq áıel mert boldy. Eki jolaýshy medıtsınalyq kómekke júgindi.
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy 20 qańtarda bolǵan.
«Jol apaty 20 qańtar kúni saǵat 16:30 shamasynda respýblıkalyq mańyzy bar Aqtóbe-Atyraý-Astrahan tas jolynyń 659-shaqyrymy tusynda tirkeldi. Shevrolet Cobalt markaly kóliktiń rýlinde Ózbekstan Respýblıkasynyń 1992 jylǵy azamaty bolǵan. Sheteldik júrgizýshi kóliktiń basqara almaı, qarsy baǵytta kele jatqan Mercedes Benz Actros markaly júk kóligine soqtyǵysqan. Jol-kólik oqıǵasynyń saldarynan Chevrolet Cobalt avtokóliginde otyrǵan 1982 jylǵy jolaýshy qaza tapty. Marqum bolǵan áıel Ózbekstan Respýblıkasynyń azamaty ekeni anyqtaldy», - dep habarlady departamenttiń baspasóz qyzmeti.
Sondaı-aq, jeńil kólikte bolǵan 2 jolaýshyǵa alǵashqy medıtsınalyq kómek kórsetildi.
«Patrýldik polıtsııa rotasynyń qyzmetkerleri Atyraý qalasynan Aqtóbe, Batys Qazaqstan, Mańǵystaý jáne Reseı Federatsııasynyń Astrahan oblysy baǵytyndaǵy jolmen júretin júrgizýshilerge qaýipsizdik erejesin saqtaý jóninde únemi eskertý jasaıdy. Osyndaı eskertý Atyraý qalasynyń mańyndaǵy Saryózek eldi mekeni tusynda Shevrolet Cobalt kóliginiń júrgizýshisine berilgen. Alaıda, polıtsııa qyzmetkerleriniń eskertýin elemegen júrgizýshi jol apatyna túsip, jolaýshynyń kóz jumýyna sebepshi boldy», - dep málim etti departamenttiń baspasóz qyzmetinen.
Eske sala ketelik, buǵan deıin Atyraý oblysynda jol apatynan jedel járdem qyzmetkeri mert bolǵanyn jazǵan edik.