Atyraý oblysynda joǵalyp ketken úsh adam áli tabylǵan joq

<p>Atyraý oblysynda 9 qańtarda habar-osharsyz ketken úsh adamdy izdeý áli jalǵasyp jatyr. Kúndiz olardy izdeýge tikushaq tartylǵan edi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Oblystyq tótenshe jaǵdaılar departamentiniń qoǵammen baılanys toby joǵalǵan úsh jigittiń áli tabylmaǵanyn málim etti.

«Joǵalǵan jigitterdi izdestirý úshin 10 qańtarda saǵat 13:26–da „QazAvıaQutqarý“ AQ-nyń MI-8 tikushaǵy tartylǵan edi. Tikushaqpen 5 saǵat boıy áýeden barlaý júrgizildi. Keshki saǵat 17:00–de áýeden izdeý toqtatylyp, tikushaq keri qondy. Joǵalǵan úsh adam áli tabylmady», -dep habarlady departamenttiń qoǵammen baılanys toby.

Úsh jigit 9 qańtarda saǵat 11:00 shamasynda Maqat aýdanynyń Dossor kentinen Qyzylqoǵa aýdanyndaǵy Qarabaý aýylyna qaraı jolǵa shyqqan.

Olardan sodan beri esh derek joq.

Oblystyq tótenshe jaǵdaılar departamentiniń qutqarýshylary joǵalǵandardy avtokólikpen izdestirýdi jalǵastyryp jatyr.

Dál qazirgi ýaqytta qutqarýshylar 3 topqa bólingen. Áár topta 7-8 qutqarýshy bar. Іzdestirý-qutqarý jumystaryna 5 tehnıka tartylǵan.

Qyzylqoǵa aýdandyq polıtsııa bólimi joǵalǵan jigitter týraly derekter jazylǵan baǵyttama taratty.

Habar-osharsyz ketkenderdi izdeýge polıtsııa qyzmetkerleri men eriktiler qosylǵan.

Eske sala ketelik, budan buryn Atyraýda joǵalǵan úsh adamdy izdeýge tikushaq tartylǵanyn habarlaǵan edik.