Atyraý oblysynda jyl basynan beri jol apatynan 11 adam mert boldy
Atyraý oblystyq polıtsııa departamenti baspasóz qyzmetiniń málimetine súıensek, bıylǵy 1 aqpannan beri tártip saqshylary «Kıber-Sherıf» borttyq aqparattyq baǵdarlamasy bar 28 kólikpen jol qozǵalysy erejesiniń saqtalýyna baqylaý jasaıdy.
«Atalǵan qurylǵymen 1 aı 18 kúnde jyldamdyqty shamadan tys asyrǵan 16 myńnan astam quqyq buzýshylyq anyqtaldy. Al, 1 naýryzdan beri respýblıkalyq mańyzy bar tas joldarda 15 «Trafık-Skaner», 8 «Orakýl-Insaıt» jyldamdyq ólsheıtin quraldary iske qosyldy. Kólik jyldamdyǵyn avtomatty túrde anyqtaıtyn Trafık-Skaner quraly jol apaty jıi bolýy múmkin 15 orynda ornatylǵan. Qurylǵylardy buzyp ketpeý úshin qosymsha beınebaqylaý kameralary jedel basqarý ortalyǵyna qosyldy. Al, arnaıy kóliktiń salonyndaǵy «Orakýl-Insaıt» qurylǵysy quqyq buzýshylyqty jasyryn túrde anyqtaýǵa arnalǵan», - dep habarlady departamenttiń baspasóz qyzmeti.
Alaıda, óńirde jol-kólik oqıǵasy áli azaımaı otyr. Máselen, bıyl jyl basynan beri 50 jol-kólik oqıǵasyn tirkelgen.
«Atyraý oblysynyń aýmaǵynda jyl basynan beri jol-kólik oqıǵasynan 11 adam qaza tapty. Al, 56 adam túrli dene jaraqatyn alyp, zardap shekti. Atyraý qalasynyń aýmaǵynda tek naýryz aıynda 2 iri jol-kólik oqıǵasy tirkelip, 6 adam kóz jumdy», - dep málim etti departamenttiń baspasóz qyzmeti.
Eske sala ketelik, buǵan deıin Atyraýda kópir ústindegi jol apatynan 4 adam kóz jumǵanyn habarlaǵan edik.