Atyraý oblysynda jyl basynan beri órtten 11 adam mert bolǵan
Atyraý oblystyq Tótenshe jaǵdaılar departamenti memlekettik órt baqylaý basqarmasynyń bastyǵy Baǵdat Abdýllınniń málimetinshe, osy kezge deıin órttiń aldyn alý úshin 988 reıdtik is-shara ótkizilgen.
«Jyl basynan beri oblystyń aýmaǵynda 188 órt oqıǵasy tirkeldi. Órttiń saldarynan 11 adam mert boldy. Al 9 adam túrli jaraqat aldy. Órt qaýipsizdigi erejesin buzǵandarǵa 377 ákimshilik is qozǵaldy. Materıaldyq shyǵyn kólemi 7 mıllıon 338 myń teńge», - dep habarlady Baǵdat Abdýllın.
Onyń deregine súıensek, órt oqıǵasynyń aldyn alý is-sharalary ótkizilip, 79 433 adamǵa saqtyq sharalary týraly jadynama taratylǵan. Órt oqıǵasyna baılanysty 286 turǵynǵa eskertý berilgen. Al, 91 azamatqa 3 mln 452 myń 560 teńge kóleminde aıyppul salynǵan.
Tótenshe jaǵdaılar departamenti mamandarynyń pikirinshe, jalynnyń tutanýyna birneshe sebep áser etedi. Sonyń biri – balalardyń sirińkemen oınaýy. Máselen, búgin, 19 tamyzda Atyraý qalasyndaǵy Hımıkter kenti shaǵyn aýdanynda jeke ıeliktegi turǵyn úı órtendi. Bul týraly saǵat 12:52-de habar berilgen.
«Órt sóndirýshiler shaqyrtý jedel jetip, turǵyn úıdegi tóbe jabyndysynyń órtengenin anyqtady. Jalyn 13:21-de oqshaýlanyp, 10 mınýttan soń tolyq sóndirildi. Órttiń saldarynan 1984 jylǵy áıeldiń qolyn kúıik shaldy. Oǵan apattyq medıtsına ortalyǵynyń qyzmetkerleri alǵashqy kómek kórsetti. Keıin zardap shekken turǵyn oblystyq aýrýhanaǵa jetkizildi. Turǵyn úıdegi órt kámeletke tolmaǵan balalardyń sirińkemen oınaýynan tutanǵan», - dep habarlady departamenttiń qoǵammen baılanys toby.
Jalyndy sóndirýge tótenshe jaǵdaılar departamentinen 11 órt sóndirýshi, apattyq medıtsına ortalyǵynan 3 qyzmetker, 4 tehnıka tartyldy.
Eske sala ketelik, budan buryn Atyraý oblysynda jaz bastalǵaly sýǵa batqan 9 adamnyń tórteýi bala ekenin jazǵan edik.