Atyraý oblysynda jyl basynan beri kókjóteldiń 144 jaǵdaıy tirkelgen

<p>ATYRAÝ. KAZINFORM — Atyraý oblysynda kókjóteldiń taralý deregi kóbeıgen. Jyl basynan beri bul derttiń 144 jaǵdaıy tirkelip otyr. </p>

Atyraý oblystyq sanıtarııalyq-epıdemıologııalyq baqylaý departamenti basshysynyń orynbasary Altyngúl Aımuratovanyń málimetinshe, onyń basym bóligi Atyraý qalasynda tirkelgen.

«Kókjótel — juqpaly ınfektsııalyq dert. Ony Bordetella pertussis bakterııasy qozdyrady. Bul aýrý ásirese, balalar úshin qaýipti bolýy múmkin. Jyl basynan beri aımaqta kókjóteldiń 144 jaǵdaıynyń tirkelýi ınfektsııanyń taralý qarqyny joǵary ekenin kórsetedi. Kókjótelden qorǵanýdyń eń tıimdi ádisteriniń biri — vaktsına saldyrý. Vaktsınany turaqty alǵan adamda juqpaly aýrýlardyń juǵý qaýpi tómen bolady. Sondaı-aq, qoǵamdyq oryndarda jeke gıgıena sharalaryn saqtaýǵa mán berý qajet. Bul da aýrýdyń taralýyn tómendetýge yqpal etedi», — deıdi Altyngúl Aımuratova.

Eske sala ketelik, buǵan deıin Atyraý oblysynda 9 aıda 231 adam týberkýlez dertin juqtyrǵanyn habarlaǵan bolatynbyz. 

Atyraý oblysynda buryn aýyrǵan naýqastarmen qarym-qatynasta bolǵan 1 430 adam tekserilgen. Ókpesi aýyratyn naýqastarmen baılanys ornatqandardyń arasynda 73 bala, 650 jasóspirim, 707 eresek adam bolǵan.

Sondaı-aq, qaýip-qater tobyna jatatyn 3 myńǵa jýyq adam baqylaýdan ótken.