Atyraý oblysynda jyl basynan beri 6 bala terezeden qulaǵan
Atyraý oblystyq tótenshe jaǵdaılar departamenti tótenshe jaǵdaılardyń aldyn alý bóliminiń bastyǵy, azamattyq qorǵaý maıory Sábıt Borashevtyń aıtýynsha, keıingi kezde balalardyń jazataıym oqıǵaǵa ushyraýy jıilegen.
«Ásirese, 2-7 jasqa deıingi balalardyń terezeden qulaýy kóbirek kezdesedi. Negizgi sebep – ońaı ashylatyn plastıkalyq tereze. Ata-analar balalarynyń qaýipsizdigine salǵyrttyq tanytady. Kópshiligi balalaryn úıinde qaraýsyz qaldyryp ketedi. Osyndaı sebeptiń saldarynan jyl basynan beri 6 bala terezeden qulady», - deıdi Sábıt Borashev.
Onyń málimetine súıensek, tótenshe jaǵdaılar departamentiniń usynysymen áleýmettik turmysy tómen 30 otbasynyń úıine terezeni buǵattaıtyn arnaıy tetik ornatylǵan. Mundaı tetikti ornatýǵa demeýshiler qoldaý kórsetken.
«Bul tetiktiń balalardyń qaýipsizdigi úshin paıdasy zor. Birinshiden, terezeniń keń ashylýyna kedergi keltiredi. Ekinshiden, balalardy terezeden qulaýdan saqtaıdy. Eń bastysy, ata-analarǵa balalardy keleńsiz jaǵdaıǵa urynýydan qorǵaý úshin olardy úıde jalǵyz qaldyrmaý qajettigin eskertemiz», - dep málim etti Sábıt Borashev.
Eske sala ketelik, buǵan deıin Atyraýda 4 jasar bala balabaqshanyń káriz qudyǵyna qulap, mert bolǵanyn jazǵan edik.
Sondaı-aq 10 jasar bala «Munaıshy» stadıonynda basseınge batyp ketti.