Atyraý oblysynda jyl basynan beri 43 adam AITV ınfektsııasyn juqtyrǵan
Atyraý oblystyq AITV ortalyǵy baspasóz qyzmetiniń málimetinshe, qaýipti aýrýdyń alǵashqy deregi 1993 jyly tirkelgen. Sol kezden beri 526 adamnan AITV anyqtalǵan. Qazir ortalyqta 359 adam dıspanserlik esepte tur.
«Jyl basynan beri ortalyqtyń zerthanasynda 100 myńnan astam synamaǵa zertteý júrgizildi. AITV deregin anyqtaýǵa arnalǵan avtomatty zertteý qurylǵysy bıomaterıaldy sapaly, ári tez taldaý júrgizýge múmkindik beredi. Máselen, júkti analar eki ret tekserýden ótedi. Olardyń jynystyq seriktesteri tekseriledi. Qazir AITV juqtyrǵan 4 júkti ana men perınataldyq baılanystaǵy 11 bala dárigerlerdiń baqylaýyna alyndy», - dep habarlady ortalyqtyń bólim meńgerýshisi Tólemis Shámenov.
Ortalyq dırektory Qýanysh Nurmuhanovtyń aıtýynsha, AITV ınfektsııasy – áleýmettik aýrýdyń biri.
«AITV ınfektsııasynyń taralýy adamnyń minez-qulqymen tikeleı baılanysty órbıdi. Ár adam jeke qorǵanys quraldaryn paıdalaný kerek. Qaýipti ınfektsııany juqtyrǵan adammen kezdesseńiz, ony shettetpeı, qoldaý bildirgen jón. Ásirese, jas urpaqty atalǵan indetti juqtyrý qaýpinen qorǵaýymyz kerek», - deıdi Qýanysh Nurmuhanov.
Eske sala ketelik, buǵan deıin Atyraý oblysyna qyzylshaǵa qarsy vaktsınanyń 20 myń dozasy jetkizilgenin habarlaǵan edik.