Atyraý oblysynda jyl basynan beri 41 ekonomıkalyq qylmystyq is tergelgen
Atyraý oblysy boıynsha ekonomıkalyq tergep-tekserý departamenti basshysynyń orynbasary Balnur Esengeldınovtiń aıtýynsha, «Kıberqadaǵalaý» júıesiniń kómegimen byltyrdan beri 355 saıt pen qarjy pıramıdasynyń belgileri bar akkaýnttar buǵattalǵan. Onyń ishinde 215 saıt bıyl isten shyǵarylǵan.
«Departament qyzmetkerleri jyl basynan beri 41 ekonomıkalyq qylmysty tergedi. Onyń 70 paıyzy sotqa joldandy. Sońǵy kezde qumar oıynǵa salynyp, ońaı jolmen aqsha tabýǵa qumartatyndar kóbeıdi. Qumar oıynǵa qunyqqan adam ártúrli qıyndyqqa dýshar bolady. Aldymen qomaqty qarjysynan aıyrylady. Bul olardyń minez-qulqyna teris áserin tıgizip, qoǵamnan birtindep alshaqtaı bastaıdy. Aǵaıyn-týystarymen, dostarymen baılanys úzip, kúızeliske túsedi. Jasyratyny joq, qumar oıyn adamdy óz-ózine qol jumsaý, bir-birin óltirý, ajyrasý, urlyq, zorlyq-zombylyq jasaý sekildi qylmystarǵa uryndyrady. Tipti, qumar oıynǵa jibergen aqshasyn qaıtarý úshin qaryzǵa batatyndar bar», - deıdi Balnúr Esengeldınov.
Eske sala ketelik, buǵan deıin Atyraýda byltyrdan beri qarjy pıramıdalarynyń 355 siltemesi buǵattalǵanyn habarlaǵan bolatynbyz.