Atyraý oblysynda Jem ózeniniń sýy 2 metr 53 sm-ge kóterildi
Oblystyq jedel shtabtyń málimetine súıensek, Jem ózeniniń sýy Aqkıizoǵaı aýylynyń irgesine deıin jetken.
«Aýyldyń tusynda sý deńgeıi 3 metr 25 sm-ge deıin kóterildi. Sol sebepten, aýyldy sýdan qorǵaý úshin 100-ge jýyq adam, 11 tehnıka jumyldyryldy. Turǵyndar 1 500 qapqa qum toltyrylyp, jaǵalaýǵa tósedi. Qazir Aqkıiztoǵaı aýylynda jaǵdaı turaqtaldy. Turǵyn úılerge, ózge de nysandarǵa sý kirgen joq. Jem ózeniniń sý deńgeıi keshegi kórsetkishten 3 sm-ge ósip otyr», - dep habarlady oblystyq jedel shtabtan.
Aýdandaǵy Turǵyzba, Shoqpartoǵaı, Aqkıiztoǵaı aýyldarynda jáne Qaraǵaı eldi mekeninde, Qulsary qalasynyń ortasyndaǵy Qursaı ózeginiń jaǵalaýyna topyraq tógilip, bóget bıiktetilip, qum toltyrylǵan qappen nyǵaıtylǵan.
«Eldi mekenderdi tasqyn sýdan qorǵaý jumysy áli de jalǵasyp jatyr. Atyraý qalasynan 50-ge tarta sarbaz kómekke keldi. Aýdan aýmaǵynda sý tasqynynyń qaýpin seıiltý jumysyna 2 myń erikti, 60-qa jýyq tehnıka tartyldy. Bógetti nyǵaıtýǵa qum salynǵan 20 myńnan astam qap daıyndaldy», - dep málim etti oblystyq jedel shtabtan.
Eske sala ketelik, budan buryn Atyraý oblysyndaǵy bir aýdanda tótenshe jaǵdaı jarııalanǵanyn habarlaǵan bolatynbyz. Keıin Oıyl ózenindegi sý tasqynyna baılanysty Mııaly aýylynan 559 turǵyn evakýatsııalandy.
Sondaı-aq Mııaly aýylyna tirelgen sýdyń deńgeıi 1 metr 20 sm qurady. Oıyl ózeniniń mańynan 7 sharýa qojalyǵy qaýipsiz aýmaqqa kóshirildi.
Mııaly aýylyn tasqyn sýdan qorǵaý jalǵasyp jatqanyn jazǵan edik. Oıyldyń arnasynan asqan sý Mııaly aýyly mańyndaǵy kópirdi buzyp ketti.
Keshe Atyraý oblysyndaǵy Kózdiqara aýylynyń turǵyndaryn evakýatsııalaý bastaldy. Sondaı-aq keshe sý tasqynynan Qyzylqoǵa aýdanyndaǵy 8 okrýgke áli de qaýip bar ekenin habarladyq.
Búginde Atyraý oblysynda sý tasqynynyń qaýpi áli tolyq seıilmegenin jazdyq.