Atyraý oblysynda Jaıyqtaǵy sý tasqynynan keıin 4 kanal tereńdetilip jatyr
Inder aýdandyq aýyl sharýashylyǵy bóliminiń basshysy Mámbetqalı Qusaıynovtyń aıtýynsha, kanaldardan egin sharýashylyǵy men tórt túlikke sý alynady.
«Inderbor kenti jáne Bódene aýyldyq okrýginiń mańymen ótetin «Alǵabas-Joryq» kanaly 1968 jyldan beri jumys istep tur. Bul kanaldyń sýyn 15 sharýa 119 gektar jerge egin salyp, jemis aǵashtaryn ósirýge paıdalanyp otyr. Sý arnasynyń uzyndyǵy – 64,7 shaqyrym. Al, Kóktoǵaı aýyldyq okrýginiń aýmaǵyndaǵy «Aqsaı» kanalynyń boıynda 7 kásipker 164 gektar alqapqa egin egedi. Atalǵan sýarý-sýlandyrý arnasy 80 shaqyrymǵa sozylady. Ony jóndeý jumysy 2022 jyly bastalǵan edi. Jyl sońyna deıin eki arnany jóndeý jumysy aıaqtalady», - deıdi Mámbetqalı Qusaıynov.
Onyń deregine qaraǵanda, kanaldardan turǵyndar ıeligindegi 4 túlik sý ishedi. Óıtkeni, mal sýarý úshin qazylǵan burynǵy qudyqtar tartylyp qalǵan. Keıbiriniń sýy aşy bolǵandyqtan, mal sýarýǵa jaramaıdy.
«Taǵy 2 kanaldyń túbin tereńdetip, sý ótkizý qýatyn arttyrýdy qolǵa aldyq. Bul –uzyndyǵy 102,3 shaqyrymdyq «Baǵyrlaı» jáne 51,7 shaqyrymǵa sozylyp jatqan «Quraıly Saı» kanaly. Aldaǵy jyly atalǵan eki kanaldy jóndeý jumysyn tolyqtaı aıaqtaý josparlanyp otyr», -dp habarlady Mámbetqalı Qusaıynov.
Eske sala ketelik, buǵan deıin Atyraý oblysyndaǵy 4 kanalǵa jóndeý júrgizý úshin 3,1 mlrd teńge jumsalatynyn habarlaǵan edik.