Atyraý oblysynda úsh aıda sýǵa batqan 25 adamnyń 14-i – jasóspirim
Bul máselege Atyraý oblysynyń ákimi Serik Shápkenovtiń tóraǵalyǵymen arnaıy jıynda nazar aýdaryldy. Oblys ákimi apparatynyń baqylaý jáne taldaý bólimi basshysynyń mindetin atqarýshy Saıan Medenovtiń aıtýynsha, bıyl sýǵa batqandardyń sany artqan.
«Atyraý oblysynda keıingi úsh aıda 25 adam sýǵa batyp ketti. Onyń ishinde 14 jasóspirim bar. Sýǵa batqandardyń sany byltyrǵymen salystyrǵanda eki esege ósti. Jazataıym oqıǵa ata-analardyń bala qaýipsizdigine salǵyrt qaraýynan bolyp otyr. Ásirese, Atyraý qalasy men Qurmanǵazy aýdanynda sýǵa batý deregi jıi tirkeledi. Qaýipsizdik týraly túsindirý jumysyna baılanysty áleýmettik jelige monıtorıng júrgizdik. Sýdaǵy qaýipsizdik týraly túsindirý jumysynyń 90 paıyzyn tótenshe jaǵdaılar departamenti men polıtsııa qyzmetkerleri ǵana júrgizip keledi. Al, oblys, qala jáne aýdan ákimdikteriniń resmı paraqshasynda jazba, ne beınerolıkter júktelmegen. Shomylý maýsymy bastalmaǵany týraly jan-jaqty túsinik júrgizilmegen», - dedi Saıan Medenov.
Polıtsııa departamenti bastyǵynyń birinshi orynbasary Ábdiǵanı Seıdýalıevtiń aıtýynsha, jaz bastalǵaly beri 154 adam ákimshilik jaýapkershilikke tartylǵan. Al, 48 ata-ana tyıym salynǵan oryndarda shomylǵany anyqtalǵan. Jaǵalaýda mas kúıinde júrgen 54 adamǵa 1 mln 69 myń 740 teńge aıyppul salynǵan.
Oblys ákimi Serik Shápkenovtiń pikirinshe, jazataıym oqıǵalarǵa taldaý júrgizip, aldyn alý úshin is-sharalarynyń josparyn ázirlegen jón.
«Adamnyń ómirinen qymbat nárse joq. Ásirese, balalardyń qaýipsizdigi basty nazarda bolýǵa tıis. Buryn kóshede qaıǵyly oqıǵalardyń aldyn alý týraly banner ilinip, áleýmettik jelide beınerolıkter taralatyn edi. Qazir mundaı joq. Demek, ákimdikter nemquraılyq tanytady. Mektepterde oqýshylarǵa synyp saǵatyn júrgizip, ata-analarǵa zamanýı baılanys quraldary arqyly túsindirý qajet. Tótenshe jaǵdaılar jáne polıtsııa departamentteri eriktilermen birge sý aıdyndarynyń qaýipti tustaryn anyqtaýy kerek. Osyǵan oraıpolıtsııanyń jedel toptaryn kóbeıtip, turǵyndarǵa aqparat taratýǵa qoǵam belsendilerin tartqan jón. Aýyldyq okrýgterdiń ákimderi turǵyndarǵa qaýipti núkteler týraly jıi habarlap otyrýy kerek», - dedi Serik Shápkenov.
Eske sala ketelik, buǵan deıin Atyraý oblysynda jaz bastalǵaly sýǵa batqan toǵyz adamnyń tórteýi bala ekenin jazǵan bolatynbyz.