Atyraý oblysynda tasqyn sýy 18 myń gektar shabyndyq alqabyn sýarýǵa jiberildi

<p>ATYRAÝ. KAZINFORM &ndash; Atyraý oblysy boıynsha &laquo;Qazsýshar&raquo; mamandary Oıyl ózeni arqyly kelgen tasqyn sýyn óńirdegi 18 myń gektardan astam shabyndyq alqabyn sýarýǵa jiberdi. Osynyń nátıjesinde Oıyl ózenindegi sý deńgeıi tómendegen.&nbsp;&nbsp;</p>

Jaıyq ózeni arqyly kelgen tasqyn sýyn Baqsaı, Naryn, Saryózek jáne Sokolok kanaldary arqyly sýarý-sýlandyrý júıelerine, lımandarǵa jáne Kaspıı teńizine baǵyttaý jumysy júrip jatyr. Saryózek kanalynyń tasqyn sýyn qabyldaıtyn arnasy tazartylyp, qorǵanys bógeti nyǵaıtyldy. Kanaldyń tómengi bóliginen jańadan 4,2 shaqyrym kanal turǵyzylyp, Atyraý qalasyna qarasty Erkinqala aýyldyq okrýginiń aýmaǵyndaǵy 1 500 gektar shabyndyq alqaby sýaryldy. Saryózek arqyly da tasqyn sýy Kaspıı teńizine baǵyttalady.

Tasqyn sýyn qaýipsiz ótkizý maqsatynda Baqsaı kanaly boıyndaǵy qubyrlar men bógetter alynyp tastaldy. Sýdy teńizge jiberý úshin jańadan 4 shaqyrym kanal turǵyzylyp, Naryn kanalynyń bas bóliginiń arnasy tazartyldy. Búginde kanal boıyndaǵy 4,5 gektar shabyndyq alqabyn tasqyn sýymen sýarý jumysy júrgizilýde. 

«Qazirgi ýaqytta negizgi maqsattardyń biri – tasqyn sýyn tıimdi paıdalaný. Jaıyq ózeni arqyly Kaspıı teńizine shamamen 1 mlrd tekshe metrden astam sý jiberildi. Sondaı-aq kólderdi, lımandardy jáne jerasty sýlarynyń oryndaryn toltyrý úshin de sý jiberilip jatyr», - dedi sý resýrstary jáne ırrıgatsııa mınıstrliginiń resmı ókili Móldir Ábdýalıeva.