Atyraý oblysynda sý tasqynymen kúreske 673 tehnıka jáne 7 myń erikti jumyldyrylǵan

<p>ASTANA. KAZINFORM &ndash; Atyraý oblysy ákiminiń baspasóz hatshysy Rýslan Jumaǵazıev óńirdegi sý tasqyny jaǵdaıyn baıandady.</p>

«Qazgıdromettiń» málimetinshe, ótken táýlikte Mahambet kentindegi Jaıyq ózeniniń gıdropostynda sý deńgeıi 45 sm, Atyraý qalasynda – 36 sm kóterilgen. Jaǵalaýdy nyǵaıtý jumystaryn kúsheıtý úshin jergilikti atqarýshy organ tapsyrys bergen barlyq jol, qurylys jumystary toqtatyldy. Sondaı-aq, iri munaı kompanııalarymen kelissózder júrgizildi», - dedi R. Jumaǵazıev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, qala 107 ýchaskege bólingen. Shamamen 673 tehnıka jáne 7 myń erikti jumys istep jatyr. Sońǵy 3 kúnde 42 km jaǵalaýdy nyǵaıtý bógetteri salynyp, 350 myńnan astam qapshyq tóselgen.

Jaqyn arada óńirge Jambyl, Túrkistan, Mańǵystaý oblystarynan qosymsha aýyr tehnıka keledi.

«Inder aýdanynda da osyndaı jumystar júrgizilýde, qazir Jaıyq ózenindegi sý deńgeıi 4,39 m quraıdy, jaǵalaýdy nyǵaıtý jumystaryna 74 tehnıka men 610 qyzmetker jumyldyryldy. Mahambet aýdanynda – jalpy uzyndyǵy 80 km bóget salynǵan, onyń 64 shaqyrymy qaıta qurý men kúsheıtýdi qajet etedi. Búgingi tańda 37 km bóget kúsheıtilip, qaıta jańartyldy, 12,8 km bóget qaıta salyndy. Jylyoı aýdany boıynsha jaǵdaı turaqtaldy», - dedi spıker.