Atyraý oblysynda salynyp jatqan joldyń qalyńdyǵy talapqa saı emes

<p>Atyraý oblysynda Reseı shekarasyna deıingi aralyqta jol qurylysy salynyp jatyr. Alaıda, jol qurylysynda birneshe kemshilik anyqtalǵan. Onyń ishinde kern qalyńdyǵy talapqa saı emes, dep habarlaıdy Kazinform.</p>

«Jol aktıvteriniń ulttyq sapa ortalyǵy» RMK Atyraý oblystyq fılıalynyń bólim basshysy Nurlan Jantýrınniń aıtýynsha, jyl basynan beri Atyraýdan Reseı shekarasy (Astrahan baǵyty) deıin salynyp jatqan qurylysyna 69 ret tekserý júrgizilgen.

«Jol qurylysyna paıdalanylyp jatqan qurylys materıaldarynan 390 synama alyndy. Onyń ishinde 65 synamanyń Qazaqstan Respýblıkasynyń standarttaryna saı emestigi anyqtaldy. Máselen, jol qurylysynyń keı jerinde paıdalanylǵan iri keýekti qıyrshyq tas, qaraqıyrshyqtas fraktsııasy men kern keskininiń qalyńdyǵy talapqa saı kelmeıdi. Jol jabyndysynyń tolyqtaı tóselip bitpeı, kólik qozǵalysy úshin ashylǵan keı bóligi tegis emes. Bul jol jabyndysynyń joǵarǵy qabaty tóseler aldynda qaıta qalpyna keltirý kózdelgen. Osy kezge deıin anyqtalǵan sáıkessizdiktiń 9-y qalpyna keltirildi», — dep habarlady Nurlan Jantýrın.

Foto: «Jol aktıvteriniń ulttyq sapa ortalyǵy» RMK Atyraý oblystyq fılıaly

Onyń aıtýynsha, 2020 jyly atalǵan baǵyttaǵy joldyń 20 shaqyrymy qaıta paıdalanýǵa berilgen. Al, bıyl 40 shaqyrymyn iske qosý kózdelgen. Sondaı-aq, jyl sońyna deıin joldyń 217 shaqyrymyn kólik qolǵalysy úshin ashý josparlanǵan.

Eske sala ketelik, buǵan deıin Atyraýdan Reseımen shekaraǵa deıingi joldy jóndeýge 18 mlrd teńge bólingenin habarlaǵan bolatynbyz.