Atyraý oblysynda Reseıge baǵyt alǵan aýyr júk kóligi 9 túıeni qaǵyp ketti

<p>ATYRAÝ. KAZINFORM &ndash; Atyraý oblysynda aýyr júk kóligi jol boıynda júrgen 9 túıeni qaǵyp ketti. Júk kóligin Ázerbaıjan Respýblıkasynyń azamaty júrgizgen.</p>

Atyraý oblystyq Polıtsııa departamenti baspasóz qyzmetiniń málimetinshe, jol-kólik oqıǵasy keshki saǵat 19:20 shamasynda bolǵan.

– Aqtóbe-Atyraý-Reseı federatsııasynyń shekarasy baǵytyndaǵy tas joldyń 814-shaqyrymy tusynda júk kóligi 9 túıeni qaǵyp ketti. Jol-kólik oqıǵasy Qurmanǵazy aýdanyndaǵy Qurmanǵazy aýylyna jaqyn mańda tirkeldi. Túıeler jol boıynda qaraýsyz júrgeni anyqtaldy. Ázerbaıjan Respýblıkasynda tirkelgen júk kóliginiń júrgizýshisi medıtsınalyq saraptamadan ótkizildi. Saraptama qorytyndysyna sáıkes júrgizýshiniń alkogoldik ishimdik ishpegeni belgili boldy. Jol-kólik oqıǵasynan júrgizýshi jaraqat almady, - dep habarlady departamenttiń baspasóz qyzmeti.

Polıtsııa qyzmetkerleri atalǵan jol-kólik oqıǵasyna qatysty tıisti is-qujattaryn jınaqtady.

– Kólik júrgizýshilerine táýliktiń barlyq kezeńinde jol qozǵalysy erejesin saqtap, jyldamdyqty shekten asyrmaýdy eskertemiz. Ásirese, keshki mezgilde jolda júrgende qaýipsizdik sharasyn qatań saqtaǵan jón. Al turǵyndar jeke ıeliktegi tórt túlikti jol boıyna qaraýsyz jiberýge bolmaıtynyn eskerýi qajet, - dep málim etti departamenttiń baspasóz qyzmeti.

Eske sala ketelik, buǵan deıin poıyzǵa soqtyǵysqan júk kóliginiń júrgizýshisi Qulsarydaǵy aýrýhanada jatqanyn jazǵan bolatynbyz.