Atyraý oblysynda Mııaly aýylyn tasqyn sýdan qorǵaý jalǵasyp jatyr

<p>ATYRAÝ. KAZINFORM &ndash; Atyraý oblysynyń Qyzylqoǵa aýdanyndaǵy Mııaly aýylyna tóngen tasqyn sýdyń qaýpi áli tolyq seıilgen joq.</p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Oıyl ózenindegi sý deńgeıi úsh kúnde 4 metr 80 sm-ge jetken. Al, búgin 98 sm-ge tómendedi. Buǵan Aqtóbe óńirindegi kúnniń jylynýy men jaýyn-shashyn áser etken.

Al, Qyzylqoǵa aýdany ákimdiginiń málimetinshe, keshe, 31 naýryzda Oıyl ózeni arnasynan asqan. Sol sebepten, aýdanda tótenshe jaǵdaı jarııalanyp, Mııaly aýylynyń turǵyndaryn ishnara evakýatsııalaý bastalǵan.

Oıyl ózenindegi sýdyń arnasynan asýyna baılanysty okrýgterge qaıyqpen qatynaý toqtatylǵan. «Mııaly-Saǵyz» baǵytyndaǵy joldy sý basyp, kólik qatynasyna shekteý qoıylǵan.

«Mııaly aýylynyń irgesindegi bógetti kóterý, bekitý, qapshyqqa qum toltyrý jumystaryna mekemelerden 275, polıtsııa bóliminen 48, tótenshe jaǵdaılar bóliminen 35 qyzmetker, 3 myńnan astam erikti jumyldyryldy», - dep habarlady aýdandyq ákimdikten.

Oblystyq qurylys, sáýlet jáne qala qurylysy basqarmasy arqyly «Nurkapıtal» JShM- dan 1 býldozer, «Suńqar Qurylys LTD» jáne «Temirstroıservıs» JShS-dan 2 júk tıegish, 2 ekskavator, «Nurkapstroıgaz» JShS-dan 1 júk tıegish tehnıka kómekke kelgen.

Jergilikti 15 kásipker aýyldy tasqyn sýdan qorǵaý úshin 1 500 adamdyq ystyq taǵam men sýsyn daıyndaǵan.

«Tasqyn sýdyń qaýpi tóngende aýyldyń úlkeni men jasy qolǵa kúrek alyp, mekenimizdi qorǵaý úshin kóz ilmedi. Biz olardy jáne barlyq tehnıkamen kómektesken «AIS» JShS-niń jumysshylaryn ystyq taǵammen qamtýdy uıǵardyq. Kásipkerler úsh kúnnen beri ózderiniń saýda oryndarynyń jumysyn toqtatyp, taǵam daıyndap júr», - deıdi jergilikti kásipkerler palatasynyń basshysy Altynzer Baımuratova.

Ystyq jáne ózge de taǵamdar «Baqyt» meıramhanasynda ázirlengen. Munda úzdiksiz jumys istep júrgenderdiń arasynda Gúlzıra Eleýǵalıqyzy da bar.

«Halqymyzdyń birligi men berekesi osyndaı sátte kórinedi. Er azamattar kúni-túni aýyldy sýdan qorǵaý úshin aýyzbirshilik tanytty. Men de ózimniń kıim satatyn dúkenimniń esigin kilttep, osy jerde júrmin. Tek tabıǵı apattan aman shyqsaq eken», - deıdi Gúlzıra Eleýǵalıqyzy.

Mııaly aýylynyń Báıseý bóliginde turatyn Serik Ojaevtyń otbasy músheleri bóget turǵyzyp, qapshyqqa qum toltyryp jatqandardy tamaqtandyrǵan.

Eske sala ketelik, budan buryn Atyraý oblysyndaǵy bir aýdanda tótenshe jaǵdaı jarııalanǵanyn jazǵan bolatynbyz.

Keıin Oıyl ózenindegi sý tasqynyna baılanysty Mııaly aýylynan 559 turǵyn evakýatsııalandy.

Sondaı-aq, Mııaly aýylyna tirelgen sýdyń deńgeıi 1 metr 20 sm qurady.

Oıyl ózeniniń mańynan 7 sharýa qojalyǵy qaýipsiz aýmaqqa kóshirildi.