Atyraý oblysynda kúkirt tıelgen vagondar temirjoldan shyǵyp ketti

<p>ATYRAÝ. KAZINFORM &mdash; Atyraý oblysynda júk poıyzynyń 7 vagony temirjoldan jartylaı shyǵyp ketti. Vagondarǵa kúkirt tıelgeni anyqtalyp otyr.</p>

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, oqıǵa búgin, 14 aqpanda bolǵan. 

«Búgin, 14 aqpanda jergilikti ýaqytpen saǵat 03:25-te Jylyoı aýdany, Qulsary temirjol stansasyna qarasty №11-temirjolda júk poıyzynyń vagondary relsten jartylaı shyǵyp ketkeni tirkeldi. Júk vagondaryn alyp kele jatqan teplovozdyń «Teńizshevroıl» JShS-ǵa tıesili ekeni anyqtaldy. Júk poıyzynyń quramynda 62 vagon bolǵan. Kúkirt tıelgen vagondardyń 7-eýi relsten jartylaı shyǵyp ketti», - dep habarlady departamenttiń qoǵammen baılanys toby. 

Relsten shyǵyp ketken vagondardan kúkirt tógilmegen. Eshkim zardap shekpegen. 
Jóndeý-qalpyna keltirý jumystaryn júrgizý úshin Maqat aýdanynan arnaıy poıyz jolǵa shyqty.

Foto: Atyraý oblystyq TJD

Eske sala ketelik, buǵan deıin Atyraý oblysynda qatty jel birneshe nysannyń shatyryn ushyrǵanyn habarlaǵan edik.