Atyraý oblysynda kóktemgi sý tasqynyna daıyndyqqa 2,3 mlrd teńge bólingen
Atyraý oblystyq tótenshe jaǵdaılar departamenti bastyǵynyń orynbasary Rýslan Sharıevtiń málimetinshe, tótenshe rezervke 1 mlrd 358 mln teńge, shuǵyl shyǵyndarǵa 1 mlrd 16 mln teńge jumsaý kózdelgen.
«Atyraý oblysynyń aýmaǵynda 2024 jylǵy kóktemgi sý tasqynyna daıyndyq, yqtımal zalaldy azaıtý jónindegi is-sharalar jospary bekitildi. Sol josparǵa sáıkes sý tasqynynyń saldaryn joıýǵa 17 tonna janar-jaǵar maı, 48,5 tonna ınertti materıaldar, 25 myńnan astam qapshyq, 69 shatyr, 5 myńnan astam tósek jabdyǵy ázirlendi», - deıdi Rýslan Sharıev.
Tótenshe jaǵdaılardyń aldyn alý bóliminiń bastyǵy Asylanbek Hafızulynyń aıtýynsha, kóktemgi sý tasqyny Jaıyq, Oıyl, Qıǵash, Jem jáne Saǵyz ózenderiniń joǵary bóligine jaýǵan qardyń mólsherine baılanysty bolady.
«Kóktemgi sý tasqyny sý aıdyndarynyń jaǵalaýyndaǵy eldi mekenderge qaýip tóndiredi. Buǵan birneshe sebep bar. Birinshiden, Jaıyq ózenine Reseı Federatsııasynyń Orynbor oblysyndaǵy Irıklınsk sý qoımasynan mólsherden tys artyq sý jiberilýi múmkin. Ekinshiden, Jaıyqqa basqa ózenderden kóp mólsherde sý quıylatynyn joqqa shyǵarýǵa bolmaıdy. Reseıdiń Volgograd oblysyndaǵy Volgograd sý qoımasynan mólsherden tys artyq sý jiberilse, Qurmanǵazy aýdanyndaǵy Qıǵash, Shora ózeni men saǵalarynda sý tasqyny qaýpin týǵyzady. Qazir Atyraý oblysynyń aýmaǵynda sý tasqyny qaýpi joq», - deıdi Aslynbek Hafızuly.
Onyń deregine qaraǵanda, sý tasqynynyń aldyn alý úshin 1 153 adam tartylady. Qazir 303 tehnıka, 16 júzý quraly men 107 motopompa daıyn tur.
Eske sala ketelik, budan buryn Atyraý oblysynda Noǵaıty ózeniniń arnasy kóterilip, taǵy bir aýylda saı tasyp jatqanyn habarlaǵan edik.