Atyraý oblysynda keıbir sport nysandarynyń qurylysy toqtap tur
Oblys ákimi Serik Shápkenovtiń tóraǵalyǵymen ótken ákimdik otyrysynda eldi mekenderdi sport nysandarymen qamtý máselesi qaraldy. Oblystyq dene shynyqtyrý, sport jáne týrızm basqarmasynyń basshysy Dastanbek Qospanovtyń málimetinshe, byltyr 36 nysan paıdalanýǵa berilgen. Al, bıyl 1 sport kesheni, 2 sportzal, 7 alań iske qosylǵan.
– 2027 jylǵa deıin 26 sport keshenin salý josparlanyp otyr. Oblysta turǵyndar sany 1000-nan asatyn 68 aýyldyq okrýg bar. Onyń 28-i sporttyq keshendermen qamtylǵan. Al, 23 okrýgte sport nysanyn salý josparlansa, 17 okrýgte mundaı jumys bastalǵan joq. Mundaı okrýgtiń basym bóligi Qurmanǵazy men Mahambet aýdanynda ornalasqan, -dep málim etti Dastanbek Qospanov.
Oblystyq qurylys basqarmasynyń basshysy Nurbergen Qusaıynovtyń aıtýynsha, bıyl 8, 2024 jyly 12 sport nysanynyń qurylysy aıaqtalady. Sondaı-aq, kelesi jyly «Munaıshy» stadıonyn qaıta jańǵyrtý jumystary bastalady.
– Alaıda, aldaǵy jyly aıaqtalatyn keıbir sport nysandarynyń qurylysy toqtap tur. Onyń ishinde Qyzylqoǵa aýdanynyń Saǵyz aýylyndaǵy sport keshenin salyp jatqan merdigermen kelisimshart birjaqty buzyldy. Qurylys aıaqtaý úshin qaıta konkýrs jarııalandy. Merdiger mekeme 2 qarashada anyqtalady. Al, Inder aýdanyndaǵy Kóktoǵaı aýylynda merdiger dene shynyqtyrý-saýyqtyrý kesheniniń jumysty ýaqytyly júrgizbedi. Sol sebepten, ekonomıkalyq sotqa aryz joldandy. Atyraý qalasyndaǵy 3 sport zalynyń qurylysyna qatysty 2021 jyldyń sáýir aıynda oblystyq ekonomıkalyq tergep-tekserý departamenti qylmystyq is qozǵady. Sot protsesiniń júrgizilýine baılanysty nysandar qurylysy toqtap tur, - dep habarlady Nurbergen Qusaıynov.
Eske sala ketelik, buǵan deıin Atyraý volonterleri abattandyrý jobasynan 14 mln teńgeniń buzýshylyǵyn anyqtaǵanyn jazǵan edik.