Atyraý oblysynda qaýip áli seıilgen joq, jaǵdaı óte kúrdeli — Serik Shápkenov

<p>ATYRAÝ. KAZINFORM &mdash; Atyraý oblysynda sý tasqyny jaǵdaıy kúrdeli kúıinde qalyp otyr. Bul týraly oblys ákimi Serik Shápkenov málim etti.</p>

Ákimniń aıtýynsha, Atyraý oblysynyń aýmaǵynda bes ózen bar.

Onyń úsheýi bastaýyn Aqtóbe oblysynan alady. Al eki ózen Reseı Federatsııasynan bastalady. 

«Qazir Aqtóbe óńirinen bastaý alatyn eki ózennen eldi mekenderge qaýip seıildi. Bul — Saǵyz jáne Oıyl ózenderi. Al, Jem ózeni arnasynan asty. Sonyń saldarynan Qulsary qalasynyń eki shaǵyn aýdanyna tasqyn sý kirdi. Tasqyn sý turǵyn úılerdi, bıznes nysandaryn basty. Zardap shekken turǵyndardyń shyǵyny óteledi», -dedi Serik Shápkenov.

Qazir oblys ákiminiń tapsyrmasymen Jylyoı aýdanynyń ákimdiginde arnaıy komıssııa qurylǵan.

Sý tasqyny toqtaǵannan keıin arnaıy komıssııa zerdeleý qorytyndysy shyǵarady. 

«Prezıdenttiń arnaıy tapsyrmasyna sáıkes, tasqyn sýdan zardap shekkenderdiń bárine qoldaý kórsetemiz. Ókinishke qaraı, qaýip áli de bar. Qazir Atyraý oblysynda sý tasqynyna baılanysty jaǵdaı óte kúrdeli», -dep málim etti Serik Shápkenov. 

Eske sala ketelik, buǵan deıin tasqyn sý Atyraý oblysyndaǵy Qulsary qalasyna kire bastaǵanyn jazǵan edik.

Qulsary qalasynda 2 500 úıdi tasqyn sý basyp, 4000 adam, onyń ishinde 1 myńnan astam bala kóshirildi.

Keıin Qulsaryda ákimdik, áleýmettik nysandar men ortalyq stadıon sý astynda qaldy.