Atyraý oblysynda kásipkerler qandaı kedergige jıi tap bolǵan
Atyraý oblysynyń kásipkerleri Sybaılas jemqorlyqqa qarsy is-qımyl agenttigi preventsııa qyzmetiniń basshysy Saıan Ahmetjanovpen kezdesýde problemalyq máselelerdi sheshýge baılanysty usynystaryn aıtty.
«Kedergilerdiń eń kóbi jer qatynastary men ınfraqurylym salasynda anyqtaldy. Máselen, Atyraýda ákimdik kásipkerge bıznesin keńeıtý úshin uzaq ýaqyt jer alýǵa quqyq bermedi. Buǵan zańdy negiz bolmaǵan. Sybaılas jemqorlyqqa qarsy qyzmettiń aralasýynan keıin ǵana másele sheshildi. Kináli tulǵalar jaýapqa tartyldy. Kásipker qajetti jer ýchaskesin aldy», -dep habarlady Saıan Ahmetjanov.
Onyń aıtýynsha, jalǵa alýdy uzartý tártibin reglamentteýdiń bolmaýyna baılanysty júıelik kedergi joıylǵan. Antıkordyń usynysymen bul tájirıbe toqtatyldy.
«Kedergilerdiń bir bóligi memlekettik satyp alýlar men salyqtarǵa baılanysty týyndaıdy. Memlekettik satyp alý jelisi boıynsha negizgi problema oryndalǵan sharttardy ýaqtyly tólemeýge qatysty bolyp otyr. Atyraý oblysynyń 150-den astam kásipkeri sybaılas jemqorlyqqa qarsy qyzmettiń usynysyynan keıin ǵana tapqan aqshalaryn ala aldy. Mundaı jaǵdaılardy júıeli túrde joıý úshin Qarjy mınıstrligi tólemniń keshigýin avtomatty túrde anyqtaý maqsatynda memlekettik satyp alý portalynyń fýnktsıonalyn pysyqtaıdy. Kásipkerlerdi kez kelgen problemalyq máselemen Atyraý oblysynyń kásipkerler palatasyna, sybaılas jemqorlyqqa qarsy qyzmetke júginýge shaqyramyn», - dep málim etti Saıan Ahmetjanov.
Óńirlik departamenttiń basshysy Erulan Serikqalıev aıtýynsha, kásipkerlerden túsken ótinishtiń 34 paıyzy oń sheshimin tapqan. Jyl basynan beri 853 kásipkerdiń quqyǵyn qorǵalǵan.
«Oblystyq departamenttiń usynysymen kásipkerlerdiń quqyqtaryn buzǵany úshin 5 adam tártiptik jaýapkershilikke, 2 memlekettik organnyń laýazymdy tulǵasy ákimshilik jaýapkershilikke tartyldy. Memlekettik satyp alý, kedendik jáne salyqtyq ákimshilendirý salasynda kvazımemlekettik sektor men memlekettik organdar 155 kásipkerlik sýbektisine 1 mlrd teńge kóleminde bereshekti tóledi», - deıdi Erulan Serikqalıev.
Eske sala ketelik, budan buryn Antıkor Atyraýdaǵy 8 nysannyń qurylysyn baqylaýǵa alǵanyn habarlaǵan edik.