Atyraý oblysynda qańtardan beri jol apatynan 10 adam qaza tapty

<p>ATYRAÝ. KAZINFORM &mdash; Atyraý oblysynda jyl basynan beri 31 jol-kólik oqıǵasy tirkeldi. Jol apatynan 10 adam mert bolyp, 30 adam túrli jaraqat alǵan.</p>

Jergilikti polıtsııa qyzmeti basqarmasynyń bastyǵy Erlan Bıǵambaevtyń aıtýynsha, adam ólimine soqtyrǵan jol apaty respýblıkalyq mańyzdaǵy jolda tirkelgen. 

«Keıingi úsh kúnde aýa raıynyń qolaısyzdyǵynan respýblıkalyq jáne oblystyq mańyzdaǵy jolda kólik qozǵalysyna 9 ret shekteý qoıyldy. Joldy jabýdaǵy maqsat — júrgizýshiler men jolaýshylardyń qaýipsizdigin saqtaý. Osy kúnderi oblys aýmaǵynda 2 jol-kólik oqıǵasy tirkeldi. Máselen, «Dossor-Qulsary» baǵytyndaǵy jolda jeńil jáne júk avtokólikteri soqtyǵysyp, 1 adam qaza tapty. Al, 2 adam jaraqat aldy. Atyraý qalasynda kólik qaqqan 1 jaıaý júrginshi jaraqattandy», -dep habarlady Erlan Bıǵambaev.

Onyń aıtýynsha, 1 aqpannan beri «Kıber-Sherıf» qurylǵysy bar arnaıy kólikter patrýldik kezekshilikke shyqty. Atalǵan qurylǵymen 11 kúnde 2400-den asa quqyq buzýshylyq tirkelgen. 

«Bul — óte joǵary kórsetkish. Osy derekten kólik júrgizýshileriniń áli de jol júrisi erejesin saqtamaıtyny, jolaýshy ómirine jaýapkershilikpen qaramaıtyny ańǵarylyp otyr. Osyǵan oraı júrgizýshilerge jol júrisi erejelerin qatań saqtaýdy eskertemin», -dep málim etti Erlan Bıǵambaev. 

Eske sala ketelik, buǵan deıin Atyraýda 101 jol-kólik oqıǵasynan 16 jasóspirim mert bolǵanyn jazǵan edik.