Atyraý oblysynda ekologııany búldirgenderge 48 mlrd teńge aıyppul salynǵan

<p>ATYRAÝ. QazAqparat &mdash; Atyraý oblysynda byltyr qorshaǵan ortany lastaýǵa baılanysty 44 derek anyqtaldy. Ekologııany búldirgenderge salynǵan aıyppuldyń kólemi 48 mlrd teńgeni quraǵan.</p>

Atyraý oblysy boıynsha ekologııa departamentiniń basshysy Álibek Bekmuhametovtiń málimetine súıensek, ótken jyly jospardan tys 33 tekserý júrgizilgen. Tekserý qorytyndysy boıynsha ekologııalyq zańnama talaptarynyń 44 buzýshylyǵy anyqtalyp, ony joıý týraly 27 nusqama berilgen.

«Anyqtalǵan zań buzýshylyqtarǵa qatysty 151 ákimshilik is qozǵalyp, 48 mıllıardtan astam teńge kóleminde ákimshilik aıypul salyndy. Máselen, «Atyraý munaı óńdeý zaýyty» JShS-ǵa qatysty jospardan tys 6 tekserý júrgizildi. Tekserýler kezinde alaý qondyrǵysynda gaz jaǵýdy belgilengen normatıvte kórsetilmegen emıssııada júzege asyrǵany úshin QR Ákimshilik quqyq buzýshylyq týraly kodeksiniń 328-babynyń 3-bóligimen hattamalar jasaqtaldy. Sáıkesinshe, sot qaýlylarymen «AMÓZ» JShS-ǵa emıssııanyń tıisti kózin nemese óndiristik ýchaskeni paıdalaný týraly ekologııalyq ruqsatty toqtatpaı, shamamen 17 mln teńge kóleminde aıyppul salynyp, tolyqtaı óndirildi», -dedi Álibek Bekmuhametov.

Departament basshysynyń orynbasary Syrym Tilegenovtiń aıtýynsha, ónerkásiptik shyǵaryndylardyń synamalaryn alý úshin arnaıy oryndarmen jabdyqtalmaǵan, emıssııaǵa avtomattandyrylǵan monıtorıng júıesi engizilmegen. Qaldyqtardy basqarý talaptary buzylǵan. Sol sebepten, QR Ákimshilik quqyq buzýshylyq týraly kodeksiniń 344 jáne 325-babymen 862 500 teńgeniń aıyppul salynǵan.

«Al, «Karabatan Utility Solutions» JShS-niń qyzmetine qatysty 4 jospardan tys tekserý júrgizildi. Seriktestik tarapynan qondyrǵyǵa alynǵan kvota normasyn asyrý, jerdi búldirý, berilgen nusqamany oryndamaý túrindegi buzýshylyqtar anyqtaldy. Osyǵan baılanysty QR Ákimshilik quqyq buzýshylyq kodeksiniń 329 jáne 462-babymen hattamalar jasaqtalyp, qaraý úshin sotqa joldandy. Sot sheshimimen «KUS» JShS-ǵa salynǵan 7 mlrd teńge óndirildi», -dedi Syrym Tilegenov.

Sondaı-aq, «Teńizshevroıl», «Kazakhstan Petrochemical Industries INC.», «China National Chemical Engineering Co. LTD», «Oxygenator», «Qamqor Lokomotıv», «Jylyoı Bolashaq» JShS men «Jylyoı Sý» MKK-ǵa jospardan tys tekserý jumystary júrgizilgen. Tekserýlerdiń qorytyndysy boıynsha 39 mlrd 1 mln 231 myń teńge kóleminde aıyppul salynǵan.

Eske sala ketelik, budan buryn Atyraý oblysynda ekologııalyq zańnamany buzǵan seriktestikke 37 mlrd teńge aıyppul salynǵanyn jazǵan bolatynbyz.