Atyraý oblysynda eki aýdan ákiminiń laýazymyna 6 kandıdat talasady

<p>Atyraý oblysynyń eki aýdanynda ákim saılaýy ótedi. Isataı jáne Qyzylqoǵa aýdany ákiminiń laýazymyna 6 kandıdat talasady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Isataı aýdandyq aýmaqtyq saılaý komıssııasynyń tóraǵasy Qabyl Ǵubashevtiń aıtýynsha, aýdan ákiminiń saılaýyna 3 kandıdat tirkelgen. Kandıdattardyń 2-eýin saıası partııalar, al, 1 úmitker ózin-ózi usynyp otyr.

«Barlyq úmitkerdiń «Saılaý týraly» Konstıtýtsııalyq zań talaptaryna sáıkestigin tıisti organdar anyqtady. Isataı aýdanynyń ákimine kandıdat bolyp «AMANAT» partııasynan usynylǵan Nurym Mýsın, Qazaqstan halyq partııasynan Rashıd Muqanov, ózin-ózi usynǵan Asylan Ǵubash tirkeldi», - dedi Qabyl Ǵubashev.

Al Qyzylqoǵa aýdandyq aýmaqtyq saılaý komıssııasynyń tóraǵasy Maqsot Muqanovtyń málimetinshe, munda ákim oryntaǵy úshin 4 kandıdat qujat tapsyrǵan. Onyń 1-eýi – saıası partııanyń ókili, al 3-eýi ózin-ózi usynǵan.

«Tórt úmitkerdiń qujaty tıisti organdarǵa joldanyp, Qyzylqoǵa aýdandyq aýmaqtyq saılaý komıssııasynyń hattamasymen talapqa sáıkestigi anyqtaldy. Zańdylyqqa sáıkes Qyzylqoǵa aýdany ákimine úmitker bolyp «AMANAT» partııasynan Qanat Ázmuhanov, ózin-ózi usynýshylar Maǵjan Jeksenov pen Sándibek Salyqov tirkeldi. Bir úmitker qajetti qujattardy usynbaǵany úshin tirkeýden bas tartyldy», - dedi Maqsot Muqanov.

Osylaısha, eki aýdan ákiminiń laýazymyn ıelený úshin 6 úmitker talasady. Olardyń bári de memlekettik qyzmette jumys isteıdi. Úmitkerdiń biri aýdandyq máslıhattyń tóraǵasy, biri aýdan ákiminiń orynbasary, endi biri aýdan ákimi bolsa, 3-eýi aýyldyq okrýgtiń ákimi laýazymyn atqarady.