Atyraý oblysynda byltyr 140 balaǵa semizdik dıagnozy qoıylǵan

<p>ATYRAÝ. KAZINFORM &ndash; Ótken jyly Atyraý oblysynda 140 bala semizdik dıagnozymen tirkelgen. Bul aldyńǵy jylǵy kórsetkishten 31 balaǵa kóp.&nbsp;</p>

Atyraý oblystyq Densaýlyq saqtaý basqarmasynyń bólim basshysy Nursultan Hýsanovtyń aıtýynsha, «Deni saý ult» ulttyq jobasynda salamatty ómir saltyn ustanatyndar sanyn arttyrý men buqaralyq sportty damytýǵa basym baǵyt berilgen.

«Ulttyq jobada 14 jasqa deıingi balalar arasyndaǵy semizdikke shaldyǵýdy tómendetý qarastyrylǵan. Semizdik – aǵzada artyq maıdyń jınalýy. Semizdiktiń tórt satysy bar. Birinshi satyda adamnyń salmaǵy ádettegi qalpynan 29 paıyzǵa artady. Al ekinshisinde – 50, úshinshisinde – 100, tórtinshi satyda 100 paıyzdan asyp ketedi. Semirý tynys alý jáne júrek-qantamyr júıesin ózgeriske ushyratyp, ókpe men júrek qyzmetin álsiretedi», - deıdi Nursultan Hýsanov.

Joǵary sanatty endokrınolog Bıbigúl Aıtmaǵanbetovanyń pikirinshe, artyq salmaq túrli aýrýǵa ushyratady.

«Sońǵy 20 jylda artyq salmaqtan zardap shegetin balalar sany eki esege ósti. Kóbinese 11 jastaǵy balalar artyq salmaqtan zardap shegedi. Máselen, byltyr 10-15 jastaǵy 140 baladan semizdik dıagnozy anyqtaldy. Bul 2022 jylǵy kórsetkishten 31 balaǵa kóp. Artyq salmaqtyń saldarynan II tıpti qant dıabeti, gıpertonııa jáne júrek-qan tamyrlary aýrýlarynyń paıda bolýyna áser etedi. Munyń saldary múgedektikke ushyratýy múmkin», - deıdi Bıbigúl Aıtmaǵanbetova.

Dárigerdiń keńesine qaraǵanda, semizdikten qutylýdyń birneshe tıimdi joly bar. Birinshiden, bir ornynda otyryp qalmaı, jıi qozǵalý qajet. Ekinshiden, durys tamaqtanǵan jón. Úshinshiden, uıqy rejımin saqtaý kerek. Sondaı-aq gormondarǵa arnaıy analız tapsyrýdy esten shyǵarmaǵan abzal.

Eske sala ketelik, buǵan deıin Atyraýda onkologııa dıspanseriniń esebinde 5 myńnan asa naýqas turǵanyn jazǵan bolatynbyz.