Atyraý oblysynda aýylda turatyn jas kelinshek úıinde bosanyp qaldy

<p>ATYRAÝ. KAZINFORM &ndash; Atyraý oblysynda aýylda turatyn jas kelinshek úıinde bosandy. Keıin sanıtarlyq kólikpen jas ana men sábı Atyraý oblystyq perınataldyq ortalyǵyna jetkizildi.</p>

Atyraý oblystyq jedel járdem stansasy dırektorynyń orynbasary Nargız Baımoldaevnyń aıtýynsha, júkti kelinshek Qurmanǵazy aýdanyndaǵy Aqkól aýylynda turady.

«Júkti kelinshektiń jasy – 23-te. Ol júktiliktiń 34-35-aptasynda bolǵan. Eki-úsh kúnnen beri ishi aýyrǵanyn sezgen. Al, keshe tańerteń tolǵaǵy bastalyp, jedel járdem brıgadasy men ýchaskelik dárigerdi shaqyrǵan», - dep habarlady Nargız Baımoldaeva.

Onyń aıtýyna qaraǵanda, jedel járdem brıgadasynyń feldsherleri men jergilikti medıtsına qyzmetkerleri júkti áıeldi úıinde bosandyryp alǵan.

«Ómirge merziminen buryn kelgen uldyń salmaǵy – 2,1 keli, boıy – 51 sm. Feldsherler sábıdiń kindigine medıtsınalyq óńdeý júrgizdi. Shaqalaqtyń terisi, dene temperatýrasy men júrek soǵysy qalypty. Anasynyń jaǵdaıy jaqsy. Ana men bala aldymen Qurmanǵazy aýdandyq ortalyq aýrýhanasyna shuǵyl jetkizildi», - dep málim etti Nargız Baımoldaeva. 

Keıin jas ana men sábıdi Atyraý qalasyndaǵy oblystyq perınataldyq ortalyqqa jetkizý úshin sanıtarlyq avıatsııa shaqyrtylǵan. Alaıda, keshki mezgilde sanıtarlyq áýe kóligin ushyrýǵa múmkindik bolmaǵan, sol sebepti sanıtarlyq avtokólikpen oblystyq perınataldyq ortalyqqa jetkizilgen.

Eske sala ketelik, budan buryn Atyraýda 6 aılyq sábı mobıldi telefonnyń sım-kartasyn jutyp qoıǵanyn jazǵan bolatynbyz.