Atyraý oblysynda aýdandyq bilim bóliminiń basshysy para alý kúdigimen ustaldy

<p>Atyraý oblysynda Jylyoı aýdandyq bilim bóliminiń basshysy para alý kúdigine ilindi. Qazir kúdikti úı qamaqqa alyndy, dep habarlaıdy <a href="Kazinform." target="_blank" rel="noopener">Kazinform.</a></p>

Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, Jylyoı aýdandyq bilim bóliminiń basshysy para alý kúdigimen ustalǵan. 

«Atyraý qalasynyń mamandandyrylǵan tergeý soty kúdiktige qatysty «úı qamaǵyna alý» túrindegi bultartpaý sharasyn qoldandy. Qazir sotqa deıingi tergeý jalǵasyp jatyr», - dep habarlady departamenttiń baspasóz qyzmeti.

Ózge aqparat tergeý múddesine sáıkes jarııalaýǵa jatpaıdy. 

«Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árqaısysy kinásiz dep esepteledi», - dep málim etti departamenttiń baspasóz qyzmeti. 

Eske sala ketelik, buǵan deıin Atyraýda emhana dırektory qamaýǵa alynǵanyn habarlaǵan edik.