Atyraý oblysynda aptap ystyqtan balyqtyń jappaı qyrylý qaýpi bar

<p>ATYRAÝ. KAZINFORM — Atyraý oblysynda aptap ystyqtyń beti qaıtpaı tur. Bul Qyzyljar aýylynyń mańyndaǵy kanalda balyqtyń jappaı qyrylý qaýpin týǵyzyp tur.</p>

Jaıyq-Kaspıı oblysaralyq basseındik balyq sharýashylyǵy ınspektsııasynyń málimetine súıensek, Saryózek kanalyna baqylaý, qadaǵalaý jumysy júrgizilgen.

Atyraý qalasynan Reseı Federatsııasynyń Astrahan óńirine deıingi shekaraǵa deıin qatynaıtyn trassa boıyndaǵy kanal jaǵalaýynda ár jerde qarabalyq tuqymdas balyqtyń 2-3 danadan óleksesi baıqalǵan. 

«Joldaǵy avtokólik kópiriniń oń jaǵynda 1 shaqyrymdaı qashyqtyqtaǵy Saryózek kanaly jaǵalaýynda tiri balyq shabaqtary óte kóp. Al, Qyzyljar eldi mekeni tusynda kanal boıy jarylyp, kóp mólsherdegi sý dalaǵa jaıylyp jatyr. Aýa temperatýrasynyń ysýyna baılanysty sýdy toqtatý kerek», -dep habarlady oblysaralyq ınspektsııadan. 

Foto: Jaıyq-Kaspıı oblysaralyq basseındik balyq sharýashylyǵy ınspektsııasy

Inspektsııaǵa qarasty Atyraý balyq ınspektsııasy bóliminiń mamandary arnaıy apparattarmen sýdaǵy ottegi mólsherine, sýdyń temperatýrasyna taldaý júrgizdi. 

«Sýdaǵy otteginiń úlesi — 3,1- 3,8 mg/dm³, sýdyń temperatýrasy — 29°C, tereńdigi — 60-70 sm. Balyqtardyń jappaı tunshyǵý, qylylý faktisi anyqtalǵan joq. Alaıda, kanaldaǵy sýdyń taıyzdanýyna baılanysty balyqtardyń jappaı qyrylý, tunshyǵý qaýipi bar», -dep málim etti atalǵan ınspektsııadan.

Eske sala ketelik, buǵan deıin Atyraýdyń mańynda aqqý men úırek, qarǵa ólip jatqanyn jazǵan edik.