Atyraý oblysynda adam óltirý, kámeletke tolmaǵandardy zorlaý qylmysy ósken

<p>Atyraý oblysynda qylmystyń birneshe túri óskeni baıqalyp otyr. Onyń ishinde adam óltirý 75, kámeletke tolmaǵandardy zorlaý 60, jas balalardy azǵyndyq jolǵa túsirý qylmysy 75 paıyzǵa ósken, dep habarlaıdy <a href="Kazinform" target="_blank" rel="noopener">Kazinform.</a></p>

Mundaı derekter oblys prokýrory Baýyrjan Jumaqanovtyń tóraǵalyǵymen ótken keńeıtilgen alqa otyrysynda aıtyldy. Jıynda quqyq qorǵaý organdarynyń jeke adamǵa qarsy qylmystardy anyqtaý, jolyn kesý men ashý baǵytyndaǵy jumysy talqylandy.

«El Prezıdenti zańdylyqty saqtaý, azamattardyń quqyqtyq sanasy men quqyqtyq mádenıetin arttyrý máselelerine erekshe nazar aýdaryp otyr. Óıtkeni, memlekettiń eń qymbat qazynasy – adam jáne adamnyń ómiri, quqyqtary men bostandyqtary. Adamǵa qarsy jasalǵan qylmystar turǵyndardyń densaýlyǵyna, ar-namys pen qadir-qasıettiń qaýipsizdigine, jynystyq qol suǵylmaýshylyqqa, konstıtýtsııalyq quqyqtary men bostandyqtaryna, otbasy men kámeletke tolmaǵandardyń múddelerine qaýip tóndiredi. Azamattardyń quqyǵyn qorǵaýǵa el Konstıtýtsııasy kepildik beredi. Sol sebepten, prokýrorlyq qadaǵalaý aıasynan azamattardyń zańdy quqyqtary men múddeleri tys qalmaıdy», - dedi Baýyrjan Jumaqanov.

Oblystyq prokýratýra baspasóz qyzmetiniń málimetinshe, bıyl qylmys deńgeıi 21%-ǵa tómendegen. Alaıda, densaýlyqqa aýyr zııan keltirý faktileri 15%-ǵa (40-tan 46-ǵa deıin), adam óltirýge oqtalý 40%-ǵa (5-ten 7-ge deıin), ózin-ózi óltirý 48%-ǵa (325-ten 348-ge deıin), adam óltirý 75%-ǵa (7-den 12-ge deıin), kámeletke tolmaǵandardy zorlaý 60%-ǵa (5-ten 8-ge deıin), jas balalardy azǵyndyq jolǵa túsirý 75%-ǵa (4-ten 7-ge deıin) ósken. 

Qadaǵalaý ókilettigimen jeke adamǵa qarsy qylmystar týraly habarlamalardy qabyldaý, tirkeý kezinde zań buzýshylyqtardyń 2 faktisi anyqtalǵan. Prokýrorlyq den qoıýdyń 6 aktisi engizilip, 7 laýazymdy tulǵa tártiptik jaýapkershilikke tartylǵan.

Oblys prokýrory laýazymdy tulǵalardan profılaktıkalyq jumysty jandandyrýdy talap etti. 

«Árbir memlekettik qyzmetshi óz ortasyna úlgili, mádenıetti bolýy qajet. Bul – memlekettik qyzmetshiniń paryzy men mindeti», - dep málim etti Baýyrjan Jumaqanov.