Atyraý oblysynda 7 balasy bar otbasy turatyn úı tolyǵymen órtenip ketti

<p>Atyraý oblysynyń Qurmanǵazy aýdanynda kópbalaly otbasynyń turǵyn úıin órt shaldy. Órt 26 mınýtta sóndirildi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, órt búgin, 12 jeltoqsanda bolǵan.

«Qurmanǵazy aýdanynyń J.Nájimedenov aýylyndaǵy T.Jumaǵalıev kóshesinde ornalasqan turǵyn úı tolyq órtenip ketti. Turǵyn úıdiń jalpy aýmaǵy – 12h17 metr. Órt saǵat 9:16-da oqshaýlanyp, saǵat 9:42 tolyqtaı sóndirildi. Zardap shekkender joq», - dep habarlady departamenttiń qoǵammen baılanys toby.

Jalyndy sóndirýge Qurmanǵazy aýdanyndaǵy №7 órt sóndirý bóliminen 7 qyzmetker men 2 tehnıka jumyldyryldy. J.Nájimedenov aýylyndaǵy turǵyndardyń aıtýynsha, órt shalǵan úı 7 balasy bar otbasyǵa tıesili bolǵan. Endi aýyldastary kópbalaly otbasyǵa qarjylaı kómek berý máselesin qolǵa alyp jatyr. 

Foto: Joldasbek Shópeǵul/Kazinform

Eske sala ketelik, budan buryn Atyraý oblysynda órttiń 60 paıyzy turǵyn úı sektorynda bolǵanyn habarlaǵan edik.

Atyraý oblystyq Tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Jasulan Aqtaevtyń málimetinshe, oblys ortalyǵy men 7 aýdanda órt oqıǵasy tirkelgen.

«Bıyl oblys aýmaǵynda tirkelgen 212 órttiń basym bóligi – 120 derek Atyraý qalasynda anyqtaldy. Al Jylyoı aýdanynda 22, Mahambette – 17, Qurmanǵazyda – 14, Maqatta – 12, Inder men Qyzylqoǵada – 11, Isataı aýdanynda 5 órt boldy. Alaıda byltyrǵy kórsetkishten 12%-ǵa tómendedi», - degen edi Jasulan Aqtaev.