Atyraý oblysynda 48 boryshker áıel balalaryna alıment tólemegen

<p>ATYRAÝ. KAZINFORM &ndash; Atyraý oblysynda balalaryna alıment tólemeı júrgen 48 ana bar. Onyń ishinde 27 áıel balalaryn ákesiniń tárbıesine, al, 21 ana urpaǵyn balalar úıine qaldyryp ketken.</p>

Atyraý oblystyq Ádilet departamenti sot oryndaýshylarynyń qyzmetin retteý jáne baqylaý bóliminiń basshysy Aqbóbek Dúsipqalıevanyń aıtýynsha, alıment tóleýden jaltaratyn, tipti múldem tólemegen boryshkerler az emes.

«Qazir boryshkerlerden bereshekti óndirip alý maqsatynda tıisti jumys júrgizilip jatyr. Sonyń nátıjesinde boryshkerlerden 43 mln 375 myń teńge bereshek óndirildi. Máselen, ótken jyldan qalǵan alıment óndirýge qatysty 9564 qujat bar. Buǵan bıyl 1186 atqarý qujaty qosylyp otyr. Bul qujattyń bári sot oryndaýshylaryna jiberildi. Osy kezge deıin 983 qujatty oryndaý jumysy aıaqtaldy», - deıdi Aqbóbek Dúsipqalıeva.

Onyń aıtýynsha, jeke jáne memlekettik sot oryndaýshylarynyń óndirisinde 9637 qujat bar. Bul qujattyń bári alıment óndirýge qatysty bolyp otyr.

«Balalary úshin alıment tólemegen 48 ana boryshkerler tiziminde tur. Onyń ishinde analyq quqyǵynan aıyrylǵan, urpaǵyn balalar úıine tastap ketken 21 áıel bar. Al, 27 áıel balalaryn kúıeýiniń tárbıesine tastap ketken. Sol sebepten qazir oblysta jalǵyzbasty 27 áke balalaryn tárbıelep otyr», - dep málim etti Aqbóbek Dúsipqalıeva.

Eske sala ketelik, buǵan deıin Atyraýda burynǵy áıelin jýyný bólmesinde jasyryn vıdeoǵa túsirip, bopsalaǵan er adam sottaldy.