Atyraý oblysynda 38 mln teńgeniń múlki memleketke qaıtaryldy
Atyraý oblysynyń prokýratýrasy málim etkendeı, Mahambet aýdanyndaǵy Beıbarys aýyldyq okrýginiń ákimi «Pervomaıskıı» JShS-ǵa pontonǵa ornatylǵan sý nasosy stansasyn tender ótkizbeı, senimgerlikke bergeni anyqtalǵan.
«Mahambet aýdany prokýratýrasynyń taldaýynyń nátıjesinde sharýashylyq sýbektisi pontondyq stansany memleketke zııandy túrde qoldanýdy jalǵastyryp kelgen. Osyǵan baılanysty Mahambet aýdanynyń ákimine zańbuzýshylyqty joıý týraly usynys berilip, atalǵan múlik memleketke qaıtaryldy. Beıbarys aýyldyq okrýginiń ákimi men esepshisi tártiptik jaýapkershilikke tartyldy», - dep habarlady oblystyq prokýratýradan.
Eske sala ketelik, buǵan deıin Atyraýdaǵy munaı kompanııasyna 13,6 mlrd teńge aıyppul salynǵanyn habarlaǵan edik.
Prokýratýranyń málimetinshe, «Kaspıı neft» AQ 2021-2022 jyldary burǵylaý jáne ken ornyn paıdalaný kezinde 4500 tonnadan astam qaýipti qaldyqtarǵa jınaqtaý lımıtin almaǵany anyqtalǵan. Prokýrordyń usynysyn qaraý nátıjesinde Atyraý oblystyq sotynyń sot alqasynyń 2 shildedegi qaýlysymen «Kaspıı neft» AQ QR Ákimshilik quqyq buzýshylyq týraly kodeksiniń 328-babymen ákimshilik jaýapkershilikke tartylyp, 13 684 868 730 teńge aıyppul salyndy.
Munaı kompanııasynan óndirilgen aıyppul Ulttyq qorǵa aýdarylǵan.