Atyraý oblysynda 3 kúnde qar qursaýynan 15 adam qutqaryldy

<p>Atyraý oblysynda 7-10 qańtar aralyǵynda 15 adam qar qursaýynda qalǵan. Tótenshe jaǵdaı departamentiniń qutqarýshylary qıyndyqqa tap bolǵandardyń bárin qutqardy, dep habarlaıdy Kazinform.</p>

Oblystyq tótenshe jaǵdaılar departamenti qoǵammen baılanys tobynyń málimetine súıensek, alǵashqy shaqyrý Inder aýdanynan túsken.

Aýdan ortalyǵy – Inderbor kentinen úsh adam mal izdeýge shyqqan. Alaıda, olar keri oralmaǵan.

«Mal izdeýge shyqqan úsh adamnyń habar-osharsyz ketkeni týraly 9 qańtarda saǵat 23:05-te habar kelip tústi. Osyǵan baılanysty Inder aýdandyq tótenshe jaǵdaılar bóliminiń qyzmetkerkerleri jedel izdestirý-qutqarý jumystaryna tartyldy. Joǵalǵan 1977, 1984 jáne 1990 jylǵy úsh jigit sol kúni saǵat 08:00-de «Toyota Land Cruiser-100» markaly avtokólikpen Batys Qazaqstan oblysynyń Aqjaıyq aýdany, Janama aýylyna qaraı mal izdeýge shyqqan. Alaıda, olar keri oralmaǵan, baılanysqa shyqpaǵan», - dep habarlady departamenttiń qoǵammen baılanys toby.

Dalada qalǵan úsh adamdy izdeý 10 qańtarda sátti aıaqtaldy. Tańǵy saǵat 05:20 shamasynda joǵalǵan adamdar «Aıý» qystaǵynyń mańynan tabylyp, qaýipsiz jerge jetkizildi. «Aıý» qystaǵy Inderbor kentinen 35 shaqyrym qashyqtyqta ornalasqan.

Al, Maqat aýdanynan úsh jigit 9 qańtarda Maqat aýdanyndaǵy Dossor kentinen jolǵa shyqqan. Biraq, olar Qyzylqoǵa aýdanyndaǵy Qarabaý aýylyna jete almaǵan.

«Týystarynan jigitterdiń joǵalǵany týraly habar 10 qańtarda saǵat 00:00-de tústi. Sodan beri olardy izdeý toqtatylǵan joq. Tótenshe jaǵdaılar departamentiniń qutqarýshylary 11 qańtarda saǵat 03:20-da habar-osharsyz ketken jigitterdi Qyzylqoǵa aýdanyndaǵy «Arazmola» ýcheskesinen tapty. Olar Dossor kentinen atalǵan ýchaskege deıin 120 shaqyrym jol júrgen. Biraq, jolda kólik batyp, baılanysqa shyǵa almaǵan», - dep habarlady departamenttiń qoǵammen baılanys toby.

Dalada qalsa da kómek kelerinen úmit úzbegen jigitterdiń úlkeni – 39-da, ekinshisi – 37 jasta bolsa, kishisi 1996 jyly týǵan. Jolaýshylardyń kóligi batqan Qyzylqoǵa aýdanynda qys qaharyna minip tur. Qazir mundaǵy aýa temperatýrasy -20 gradýsqa deıin tómendegen, dalada jaıaý burqasyn bar. Jeldiń ekpini – sekýndýyna 15-20 metr.

«Aýa raıynyń osyndaı qolaısyzdyǵyna qaramastan tótenshelikter izdeý jumysyn toqtatqan joq. «QazAvıaQutqarý» AQ-nyń Mı-8 tikushaǵymen áýeden barlaý júrgizildi. Qutqarýshylarmen birge polıtsııa qyzmetkerleri men eriktilerden jáne týystarynan quralǵan úsh top eldi mekenderdi, qystaqtardy, dalalyq joldyń qaltarsy tusyn jiti sholyp, kúni-túni izdeýdi jalǵastyrdy», - dep málim etti departamenttiń qoǵammen baılanys tobynan.

Keshe, 11 qańtarda saǵat 12:07-de Maqat aýdanynyń turǵyny №8 Órt sóndirý bóliminiń baılanys beketine habarlasyp, jolda qalǵanyn aıtqan. Eki er adam Belqudyq eldi mekenine baǵyt alǵanymen, kólik qarǵa batyp qalǵan.

«Maqat kentinen 25 shaqyrym qashyqtaǵy Belqudyq eldi mekeniniń tusynda «Toyota» kóligi batyp qalǵany anyqtaldy. Kóliktegi 1956 1969 jlǵy eki azamat qaýipsiz jerge evakýatsııalady», -dep aqparat taratty departamenttiń qoǵammen baılanys toby.

Eske sala ketelik, budan buryn Atyraý oblysynda mal izdeýge shyqqan 3 adam joǵalyp ketkenin habarlaǵan edik.

Sondaı-aq, Atyraýda joǵalǵan úsh adamdy izdeýge tikushaq tartylǵanyn jazǵan bolatynbyz.

Keıin Atyraýda joǵalǵan úsh adamdy izdeýge tikushaq tartyldy.