Atyraý oblysynda 2 myń 216 kásiporyn jumyssyzdardy kvota arqyly jumysqa qabyldaıdy

<p>ATYRAÝ. KAZINFORM &mdash; Atyraý oblysynda 7 myńnan astam kásiporyn bar. Bekitilgen kvotaǵa sáıkes ár túrli sanattaǵy adamdardy jumysqa qabyldaıtyn 2 myń 216 kásiporynnyń tizimi naqtylandy.</p>

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Erkebulan Ábilqasymovtyń aıtýynsha, 100-ge jýyq kásiporyn basshylary jumyssyzdardy jumysqa qabyldaýǵa daıyn ekenin bildirdi.

«Oblys ákimdiginiń 2023 jylǵy 28 jeltoqsandaǵy №283 qaýlysyna sáıkes, túrli sanattaǵy adamdardy paıyzdyq mólshermen jumysqa ornalastyratyn kásiporyndardyń sany naqtylandy. Máselen, 282 kásiporyn 18 jasqa tolǵanǵa deıin ata-anasynan aıyrylǵan nemese qamqorlyqsyz qalǵan jastardyń 1 paıyzyn jumysqa qabyldaýy tıis. Al, 759 kásiporynǵa bas bostandyǵynan aıyrý oryndarynan shyqqan jáne probatsııa qyzmetiniń esebinde turǵan adamdardyń 1 paıyzyna jumysqa ornalastyrý usynyldy. Aýyr jáne qaýipti, zııandy jumys oryndaryn eseptemegende, múgedektegi bar adamdardyń 2-4 paıyzyn jumysqa qabyldaıtyn 1175 kásiporynnyń tizimi bekitildi»,- deıdi Erkebulan Ábilqasymov.

Tizimdegi kásiporyn basshylaryna kvota sheńberinde jumysqa ornalastyrý jáne memleket tarapynan kórsetiletin áleýmettik qoldaý sharalarynyń mán-jaıy túsindirilgen. Sondaı-aq, «Elektrondyq eńbek bırjasy» aqparattyq júıesinde kelisim-sharttardy engizý qajettigi málimet berilgen.

Eske sala ketelik, budan buryn bıyl Atyraý oblysyna jumys isteýge 4 765 sheteldik keletinin jazǵan bolatynbyz.