Atyraý oblysynda 15 qoıdy kólik basyp ketti

<p>Atyraý oblysynda respýblıkalyq tas jolda qaraýsyz úı janýarlarynyń qatysýymen 9 aıda 94 jol-kólik oqıǵasy tirkelgen. Aqtóbe-Atyraý-Astrahan tas jolynyń boıynda 15 qoıdy kólik qaǵyp ketti, dep habarlaıdy <a href="Kazinform" target="_blank" rel="noopener">Kazinform</a>.</p>

Atyraý oblystyq polıtsııa departamenti janyndaǵy patrýldik polıtsııa rotasynyń komandıri Ádilbek Shahmetovtiń aıtýynsha, oqıǵa keshe, 14 qazanda bolǵan.

– Jergilikti ýaqytpen saǵat tańǵy 06:45 shamasynda respýblıkalyq mańyzy bar Aqtóbe-Atyraý-Astrahan tas jolynyń 352-shaqyrymy tusynda Toyota Ipsum avtokóligi 15 qoıdy qaǵyp, jol-kólik oqıǵasy tirkeldi. Tekserý jumystary kezinde 1969 jylǵy azamat qoılaryn tas joldy mal ótýge arnalmaǵan tusynan qıyp ótkizbek bolǵany anyqtaldy. Soǵan baılanysty mal ıesine qatysty QR Ákimshilik quqyq buzýshylyq týraly kodeksiniń 408-babymen ákimshilik hattama toltyrylyp, jaýapqa tartyldy, - dep habarlady Ádildek Shahmetov.

Onyń aıtýynsha, Toyota Ipsum avtokóligi Qyzylqoǵa aýdanynyń ortalyǵy – Mııaly aýylynan Atyraý qalasyna baǵyt alǵany anyqtalyp otyr.

– Kólik júgizýshisine Mııaly aýylynan shyǵar kezde Qyzylqoǵa aýdandyq polıtsııa bóliminiń patrýldik polıtsııa qyzmetkerleri jol qozǵalysy erejelin qatań saqtaý qajettigin eskertken. Alaıda, kólik júrgizýshisi polıtsııa qyzmetkerleriniń eskertýin elemeı, jol-kólik apatyna sebepshi bolǵan, - dep málim etti Ádilbek Shahmetov.

Eske sala ketelik, budan buryn Atyraýda bir aıda aıyppulyn tólemeı júrgen 1 myń júrgizýshi ustalǵanyn jazǵan edik.