Atyraý oblysynda 11 kún buryn iz-túzsiz joǵalǵan er adam áli tabylmaı jatyr

<p>ATYRAÝ. KAZINFORM &mdash; Atyraý oblysynda bıyl 39 jasqa tolatyn er adam iz-túzsiz joǵalyp ketti. Ony izdeý 9 qańtardan beri úzdiksiz júrgizilip jatyr.</p>

Atyraý oblystyq polıtsııa departamentiniń baspasóz qyzmetinen málim etkendeı, er adam 9 qańtarda iz-túzsiz joǵalǵan.

«Jylyoı aýdanynyń 1985 jylǵy turǵyny 9 qańtarda úıinen shyǵyp ketken. Sol kúni túngi saǵat 22:30 shamasynda anasyna «Zırattyń janynda kele jatyrmyn. Adasyp kettim» dep habarlasqan», - dep málim etti departamenttiń baspasóz qyzmetinen.

Alaıda, sodan keıin joǵalǵan er adamnan esh habar bolmaǵan. Týystarymen baılanysqa shyqpaǵan. Onyń qaı baǵytqa ketkeni belgisiz bolyp otyr.

«Qazir habar-osharsyz ketken er adamdy izdestirý jumysy jalǵasyp jatyr. Іzdestirý jumysyna Jylyoı aýdandyq polıtsııa jáne tótenshe jaǵdaılar bóliminiń, jergilikti atqarýshy organnyń qyzmetkerleri tartyldy», - dep habarlady departamenttiń baspasóz qyzmeti.

Eske sala ketelik, budan buryn Atyraý oblysynda mal izdeýge shyqqan 3 adam joǵalyp ketkenin jazǵan edik.

Keıin joǵalǵan úsh adamdy izdeýge tikushaq tartyldy.

Sondaı-aq, Atyraý oblysynda 3 kúnde qar qursaýynan 15 adam qutqarylǵanyn habarlaǵan bolatynbyz.