Atyraý oblysyna bıyl 100 myńnan asa týrıst keldi
Atyraý oblystyq dene shynyqtyrý, sport jáne týrızmdi damytý basqarmasynyń bas mamany Jannat Sabyrǵalıevanyń aıtýynsha, aldaǵy jyly óńirde týrızmdi damytý maqsatynda birneshe is-sharany qolǵa alý josparlanǵan.
— Bıyl Atyraý oblysyna 112,3 myń týrıst keldi. Onyń ishinde 95 myńǵa jýyǵy — ishki týrımniń qatysýshylary. Al, 18 myńy — syrttan kelgen týrıst. Óńirde týrızmniń mádenı-tanymdyq, balalar-jasóspirimder, medıtsınalyq, iskerlik, ekologııalyq baǵytyn damytýǵa mol múmkindik bar. Aldaǵy jyly týrıstik aımaqtarǵa aqparattyq týrlar, lotos ósetin aýmaqta festıval ótkizý josparlanyp otyr, — dedi Jannat Sabyrǵalıeva.
Onyń pikirinshe, ásirese, sheteldik týrısterdiń qyzyǵýshylyǵyn týdyratyn birneshe baǵyt naqtylanǵan. Sonyń biri — Mahambet aýdanyndaǵy «Saraıshyq» memlekettik tarıhı-mádenı mýzeı-qoryǵy. Dál osy nysanǵa jyl basynan beri 14 myńnan asa týrıst barǵan.
Endi Túrkistan oblysymen arada týrıstik baǵytty jandandyrý kózdelip otyr. Atyraýda osyǵan baılanysty «Túrkistan — túrki áleminiń rýhanı ortalyǵy» atty roýd-shoý ótti. Jergilikti týroperatorlarmen ótken iskerlik kezdesýde Túrkistannyń týrıstik áleýeti, týrıstik baǵyttar tanystyryldy.
— Bul kezdesýdiń maqsaty — tájirıbe almasý, ekijaqty baılanys ornatý, týrısterdi óńirge tartýdyń qyr-syrymen bólisý. Mundaı jumystar bizde júıeli túrde júrgiziledi. Sonyń nátıjesinde óńirimizge ınvestorlar tartyldy. Jańadan týrıstik nysandar ashyldy, — dedi Túrkistan oblystyq týrızm basqarmasynyń bólim basshysy Botagóz Maýlenova.
Jıyn sońynda «Visit Atyrau» týrıstik ortalyǵy men «Open Turkistan» týrıstik aqparattyq ortalyǵy yntymaqtastyq týraly memorandýmǵa qol qoıdy.
Eske sala ketelik, budan buryn Almatyda Qytaıdaǵy Qazaqstan týrızm jyly jabylǵany habarlaǵan edi.