Atyraý munaı óńdeý zaýytynyń jumysy 1 qazanda toqtatylady
Atyraý munaı óńdeý zaýyty bas dırektorynyń orynbasary – bas ınjener Ádilet Shoshanbasovtyń aıtýynsha, bul – kúrdeli jóndeý emes, aǵymdaǵy josparlanǵan tekserý.
«Zaýyttaǵy tehnologııalyq qondyrǵylardy tekserý 14 qyrkúıekke josparlanǵan edi. Alaıda josparlanǵan tekserý jumysy kúzgi mezgildegi egin ónimderin jınaý kezinde fermerlerdi dızel otynymen qamtýdy toqtatpaý úshin 1 qazanǵa aýystyryldy. Mundaı josparlanǵan tekserý jumystary jyl saıyn júrgiziledi. Bul – kúrdeli jóndeý emes. Bul – tehnologııalyq qondyrǵylardaǵy bólshekterdiń, toraptardyń, mehanızmderdiń merziminen buryn tozýynyń aldyn alýǵa, jaramdylyq merzimin uzartýǵa baǵyttalǵan tehnologııalyq jabdyqty kútý, qadaǵalaý, paıdalaný jáne jóndeý jónindegi is-sharalar kesheni. Osyǵan baılanysty barlyq qondyrǵynyń jumysy toqtatylady. Biz aýa raıyn eskerip, tehnologııalyq qondyrǵylardy salqyn túskenge deıin iske qosýǵa nıettimiz», - dep málim etti Ádilet Shoshanbasov.
Onyń málimetinshe, josparlanǵan tekserý jumystaryna merdiger kásiporyndardan 1 600-ge jýyq qyzmetker, 116 arnaıy tehnıka jumyldyrylatyn bolady.
«Tekserý jumystary Qazaqstan ónerkásiptik qaýipsizdik salasyndaǵy «Azamattyq qorǵaý» týraly Zańynyń talaptaryna sáıkes júrgiziledi. Bul kezde tutynýshylarǵa munaı ónimderin jóneltý toqtamaıdy. Zaýyttyń rezervýarlarynda munaı ónimderiniń jetkilikti qory bar. Qazir 36 myń tonna avtobenzın men 32 myń tonna dızel otyny jınaqtaldy. Qazan aıynda 16 myń tonna avtobenzın, 28 myń tonna dızel otynyn óndirý josparlanyp otyr. Munaı ónimderiniń negizgi túrlerin óndirý men jóneltý Energetıka mınıstrliginiń josparyna sáıkes júzege asyrylady», - deıdi Ádilet Shoshanbasov.
Eske sala ketelik, buǵan deıin Atyraý munaı óńdeý zaýyty suıytylǵan gazdy kólikpen áketýge tyıym salynbaǵanyn jazǵan edik.