Atyraý munaı óńdeý zaýytynyń burynǵy bas dırektory qamaýǵa alyndy
Oblystyq sottyń baspasóz qyzmetinen málim etkendeı, qylmystyq is oblystyq sottyń qylmystyq ister jónindegi sot alqasynda qaralyp jatyr.
Oblystyq prokýratýranyń ókili Atyraý munaı óńdeý zaýytynyń eks-bas dırektory men satyp alý departamentiniń burynǵy dırektoryn qamaýǵa alý jóninde usynys bildirdi. Sot alqasy eks-bas dırektordy qamaýǵa alýǵa qaýly shyǵardy. Al zaýyt departamentiniń burynǵy dırektory úı qamaqta bolady.
Bıylǵy mamyrda Atyraý qalasynyń №2 sotynda Atyraý munaı óńdeý zaýytynyń («AMÓZ» JShS) burynǵy bas dırektory D. jáne satyp alý departamentiniń dırektory S.-ǵa qatysty qylmystyq is qaralyp, aıyptalýshylardy aqtaý úkimi shyǵarylǵanyn jazǵan edik.
Sol kezde munaı óńdeý zaýytynyń burynǵy bas dırektoryna QR Qylmystyq kodeksiniń 361-babynyń tórt epızodymen aıyp taǵylǵan.
Alaıda sot aıyptalýshylardyń áreketterinde taǵylǵan qylmystyq quqyq buzýshylyq quramynyń bolmaýyna baılanysty olardy barlyq epızod boıynsha kinásiz dep tanydy. Sondaı-aq sottalýshylardyń qylmystyq is júrgizýshi organ áreketterinen keltirilgen zańsyz qylmystyq qýdalaý úshin zııandy óndirý quqyǵyn tanydy.
«Sottalýshylarǵa 2019-2020 jyldary AMÓZ-de «Munaıdy tereń óńdeý keshenin» salý kezinde JShS jarǵysynyń jáne reglamenttelgen sharttyń talaptaryn buza otyryp, merdigerden jetkizilgen aqaýly qurylǵynyń qunyn talap etý jóninde sharalar qoldanbaǵany nemese merdigerdiń kepildik mindettemeleri boıynsha osy qurylǵylardy aýystyrýdy talap etpegeni úshin aıyp taǵylǵan. Osylaısha, tergeý pikiri boıynsha memleketke 2,9 mlrd teńgeden astam somaǵa zalal keltirilgen. Sot keshen qurylysyn salý kezinde jumys kóleminiń ulǵaıǵanyn anyqtady. Merdigerler qosymsha shyǵyndarǵa ushyraǵan. Buny memlekettik saraptamalardyń qorytyndylary rastaldy. Osyǵan baılanysty taraptar qosymsha sharttar jasasyp, oǵan sáıkes kepildik kórsetkishterge qol jetkizilmegen jáne anyqtalǵan aqaýlar úshin merdigerlerden somalar ustaldy. Budan basqa, «QazMunaıGaz» AQ jáne «AMÓZ» JShS keshendi salý kezinde olarǵa zalal keltirilmegeni týraly anyqtama berdi», - dep habarlaǵan edi sottyń baspasóz qyzmeti.