Atyraý munaı óńdeý zaýyty otandyq kompanııadan tabıǵı gazdy satyp alady

<p>ATYRAÝ. KAZINFORM &ndash; Atyraý munaı óńdeý zaýyty tabıǵı gazdy satyp alýy úshin &laquo;QazTransGazAımaq&raquo; AQ-men kelisim jasady.&nbsp;</p>

«AMÓZ» JShS-niń qoǵammen baılanys bóliminen málim etkendeı, bıyl 6 naýryzda zaýyt gazben jabdyqtaýshy kásiporynnan ónimniń alǵashqy partııasy qabyldanǵan. Qazir gaz qabyldaý jumystary shtattyq rejımde júrgizilip jatyr.

«Kelisim tabıǵı gazdy tikeleı «QazaqGaz» AQ-dan satyp alý maqsatyn kózdeıdi. Osy maqsat úshin «AMÓZ» JShS men «QazTransGazAımaq» AQ arasynda gaz jetkizý týraly kelisim jasady. Bıyl Atyraý munaı óńdeý zaýyty otyn gazyn tutyný kólemi 130 mln tekshe metrdi quraıtyny kútilip otyr. Bul shamamen 700 mln teńge qarajatty únemdeýge múmkindik beredi», - dep habarlady kásiporynnyń qoǵammen baılanys bólimi. 

Atyraý munaı óńdeý zaýytynda 2004 jyldan beri tehnologııalyq peshterde jaǵý úshin tabıǵı gaz qoldanylady. Bul – ekologııalyq taza otyn túriniń biri.

Eske sala ketelik, budan buryn Atyraý munaı óńdeý zaýytynyń eski bóligindegi jabdyqtar jańartylatynyn habarlaǵan bolatynbyz.