Atyraý men Maqat aýdanynda aýanyń lastanýyna baılanysty 233 derek tirkeldi

<p>ATYRAÝ. KAZINFORM &ndash; Atyraý oblysyndaǵy munaıly shahar men Maqat aýdanynda aýa sapasynyń 233 joǵary lastaný deregi tirkelip otyr. Aýada 5 márte ekstremaldy joǵary lastaný kórsetkishi anyqtalǵan.</p>

Atyraý oblystyq Ekologııa departamentiniń baspasóz qyzmeti usynǵan aqparatqa qaraǵanda, zerthanalyq-taldamalyq baqylaý bóliminiń mamandary 11 aıda 239 synama alynǵan.

– Atmosferalyq aýanyń lastanýyn, ónerkásiptik shyǵaryndylardy baqylaý jáne avtokólikter boıynsha 129 synamaǵa 1358 taldaý jasaldy. Atmosferalyq aýadan alynǵan 172 synamaǵa qatysty 526 anyqtaý júrgizildi. Aýany lastaıtyn shyǵaryndylarda 14 ret ruqsat etilgen shekti shoǵyrlaný normatıvinen asqany anyqtaldy, - dep habarlady departamenttiń baspasóz qyzmeti.

Aýadaǵy zııandy zattardy anyqtaý úshin atmosferany lastaý kózderinen 30 ónerkásiptik synama alynǵan.

– «Qazgıdromet» RMK-nyń málimetine sáıkes, Atyraý qalasy men Maqat aýdanynda ornalasqan atmosferalyq aýanyń sapasyn baqylaıtyn avtomatty stansalarda 233 joǵary lastaný jáne 5 ekstremaldy joǵary lastaný jaǵdaıy tirkeldi. Onyń ishinde Maqat aýdany boıynsha 47 joǵary lastaný anyqtaldy. Atmosferalyq aýa kúkirtsýtegimen joǵary deńgeıde lastaıtyn negizgi birneshe kásiporyn bar. Bular – «Atyraý munaı óńdeý zaýyty» JShS, «KazTransOıl» AQ, «Nort Kaspıan Opereıtıng kompanı N.V» kompanııasy men «Atyraý oblysy sý arnasy» KMK. Sonymen birge, aýany oń jaǵalaýdaǵy «Kvadrat», sol jaq bóliktegi «Týhlaıa balka» býlaný alańdary, Saryózek eldi mekendegi kárizdik sarqyndy sýdy tazartý stansasy, suıyq tehnologııalyq qaldyqtardy ornalastyrý alańy men Batys Eskene temirjol kesheni lastaıdy, - dep málim etti departamenttiń baspasóz qyzmeti.

Sondaı-aq, «Spetsavtobaza» JShS-niń sanıtarlyq qorǵaý aımaǵynan tys aýmaqta atmosferalyq aýa sapasyna monıtorıng júrgizilgen. Monıtorıng qorytyndysy boıynsha kómirtek oksıdi 17,27 mg/m3 (ShRK 5,0 mg/m3 ), metan 61 mg/m3 (ShRK 50 mg/m3) ıngredıentinen ruqsat etilgen shekti shoǵyrlanýdan asqany anyqtalǵan.

Atalǵan seriktestiktiń qatty turmystyq qaldyqtar polıgonynda birneshe ret órt bolǵan. Atmosferalyq aýanyń ýly gazben lastaný faktilerine jol bergeni úshin «Spetsavtobaza» JShS-ǵa QR Ákimshilik quqyq buzýshylyq týraly kodeksiniń 344-babynyń 4) tarmaǵymen eki márte hattama toltyrylyp, jalpy kólemi 1 mln 107 myń 600 teńge aıyppul salynǵan.

Eske sala ketelik, budan buryn aýasy lastanǵan Atyraýda qorshaǵan ortany qaı kompanııalar búldiretinin jazǵan edik.