Atyraý mańyndaǵy birneshe eldi meken turǵyndary sýsyz otyr

<p>Atyraý qalasynyń mańyndaǵy birneshe eldi mekenge salqyn sý berý toqtatyldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Atyraý qalalyq ákimdigi baspasóz qyzmetiniń málimetinshe, búgin, 4 jeltoqsanda birneshe eldi meken keshki saǵat 21:00-ge deıin salqyn sýsyz otyrady.

— «Atyraý oblysy sý arnasy» KMK óndiristik bazasy aýmaǵyndaǵy D-630 mm magıstraldi sý qubyrynda apatty qalpyna keltirý jumysyn júrgizedi. Osyǵan baılanysty 4 jeltoqsan saǵat 10:00-den 21:00-ge deıin jekelegen mekenjaılarda salqyn sý berý ýaqytsha toqtatylady», — dep habarlady ákimdiktiń baspasóz qyzmeti. 

Sýsyz qalǵan eldi mekender arasynda Qursaı, Qursaı-2, Shırına, Vodnıkov, Vodnıkov-1, Vodnıkov-2, Vodnıkov-3, Kókarna, Kókarna-2, Tasqala, Tasqala-2, Tasqala-3, Jańatalap-1, Jańatalap-2, Zaroslyı, Mırnyı aýyldary men birneshe saıajaı qoǵamdastyǵy bar.

Sý berilmegen nysandardyń tizimine atalǵan aýyldardaǵy 5 mektep pen bir jasóspirimder sport mektebi, áskerı baǵytta bilim beretin «Sarmat» mektep-ınternaty, 3 balabaqsha men 1 dárigerlik ambýlatorııa engizilgen.

Sondaı-aq, «Jaıyq-Atyraý» bekire balyǵyn ósirý zaýyty, Keńózek aýyldyq okrýg ákimdiginde de salqyn sý bolmaıtyny habarlanyp otyr.

Eske sala ketelik, buǵan deıin Atyraý oblysynyń úsh aýdanynda aýyz sý berý úsh táýlikke shektelgenin habarlaǵan bolatynbyz.