Atyraý: Qyzylqoǵadaǵy qum kóshkinin toqtatýǵa 647,9 mln teńge bólindi

<p>ATYRAÝ. KAZINFORM &ndash; Atyraý oblysynyń Qyzylqoǵa aýdanyndaǵy qum kóshkinin toqtatýǵa 647,9 mln teńge bólingen.&nbsp;</p>

Atyraý óńirlik kommýnıkatsııalar qyzmetiniń aqparatyna qaraǵanda, atalǵan aýdannyń birneshe eldi mekeninde qum kóshkini júredi. Qum kóshkini ásirese, Saǵyz, Qyzylqoǵa, Oıyl aýyldyq okrýgi men Búırek eldi mekeninde jıi baıqalady.

«Qyzylqoǵa aýdany aýmaǵyndaǵy jerdiń basym bóligi jazyq ári shóleıtti bolǵandyqtan, jıi jel soǵady. Ekpini qatty jel qum kóshkininiń júrýine sebepker bolady. Bul máseleni ońtaıly sheshý úshin aýyldardyń jan-jaǵyna sekseýil egile bastady», - dep habarlady óńirlik kommýnıkatsııalar qyzmeti.

Qyzylqoǵa aýyldyq okrýginiń ákimi Zeınolla Shálikovtyń aıtýynsha, Qarabaý aýyly mańyndaǵy 6 gektar aýmaq qorshalǵan. Endi sekseýil men kópjyldyq shóp egý josparlanyp otyr.

Óńirlik kommýnıkatsııalar qyzmetiniń málimetinshe, atalǵan jobaǵa oblystyq tabıǵı resýrstar jáne tabıǵat paıdalanýdy retteý basqarmasy tapsyrys bergen. Jobany iske asyratyn merdigerlikke «Edil-Stroı Servıs» JShS tańdalǵan. Jobanyń quny – 647 mln 981 myń 499 teńge.

«Qazir qum kóshkinin toqtatý jumysy Saǵyz, Oıyl aýyldyq okrýgteri men Búırek eldi mekeniniń aýmaǵynda júrip jatyr. Jobany jyldyń sońynda aıaqtaý josparlanǵan», - dep málim etti óńirlik kommýnıkatsııalar qyzmetinen.

Eske sala ketelik, buǵan deıin Qyzylqoǵa aýdanynda sý tasqynynan zardap shekkenderdiń shyǵyny tolyǵymen ótelgenin jazǵan edik.