Atyraý qalasynyń eks-ákimi Qaırat Orazbaevtyń isine qatysty sot úkimi shyqty

<p>ATYRAÝ. KAZINFORM &ndash; Atyraý qalasynyń burynǵy ákimi Qaırat Orazbaevtyń isine qatysty sot úkimi shyqty.</p>

Atyraý oblystyq soty baspasóz qyzmetiniń málimetinshe, búgin, 25 jeltoqsanda №2 sotta 
eks-ákim Qaırat Orazbaevtyń isine qatysty úkim shyǵaryldy. Sot úkimimen eks-ákimge bas bostandyǵyn 3 jylǵa shekteý jazasy berildi. 

Atyraý oblystyq prokýratýrasynyń baspasóz qyzmeti 2023 jyldyń 10 qarashasynda munaıly shahardyń eks-ákimi Qaırat Orazbaevtyń qamaýǵa alynǵany týraly aqparat taratty. Sol kezde Atyraý qalalyq ákimdiginiń laýazymdy tulǵalaryna qatysty alaıaqtyq belgilerimen sotqa deıingi tergep-tekserý júrgizilip jatqany habarlandy. 

– 2020-2022 jyldar kezeńinde ákimdiktiń laýazymdy tulǵalary jeke turǵyn úı qurylystary úshin rekreatsııalyq aımaqtarǵa, onyń ishinde jasyl jelek aımaqtary, saıabaqtar, skverler, jaǵalaýlar jáne taǵy basqa sanatqa jatatyn jer ýchaskelerin zańsyz bergeni anyqtaldy. Osyǵan baılanysty búgin QR Qylmystyq Kodeksiniń 190-baby 4-bóliginiń 2-tarmaǵynda kózdelgen qylmystyq quqyq buzýshylyq jasady degen kúdik boıynsha tergeý sheńberinde Atyraý qalasynyń eks-ákimi Qaırat Orazbaev ustaldy, - dep málim etti prokýratýranyń baspasóz qyzmetinen.

Keıin Atyraý oblystyq sotynyń baspasóz qyzmeti eks-ákimniń eki aıǵa qamaýǵa alynǵanyn málim etti. 

– Atyraý qalasynyń mamandandyrylǵan tergeý sotynyń qaýlysymen Qaırat Orazbaevqa qatysty eki aı merzimge kúzetpen ustaý túrindegi bultartpaý sharasy sanktsııalandy, - dep habarlady oblystyq sottyń baspasóz qyzmeti.

Al byltyrǵy jeltoqsanda Atyraý qalasynyń eks-ákimin tergeý ızolıatorynan úıqamaqqa jiberýge qaýly shyǵaryldy. 

– Atyraý qalasynyń mamandandyrylǵan tergeý sotynyń 2023 jylǵy 11 qarashadaǵy qaýlysymen Qaırat Orazbaevqa qatysty eki aı merzimge kúzetpen ustaý túrindegi bultartpaý sharasy sanktsııalanǵan edi. Atyraý oblysy prokýrorynyń ótinishhaty boıynsha mamandandyrylǵan tergeý sotynyń 2023 jyldyń 22 jeltoqsandaǵy qaýlysymen Q.Orazbaevqa qatysty bultartpaý sharasy onyń densaýlyq jaǵdaıyna baılanysty úıqamaq túrindegi bultartpaý sharasyna ózgertildi, -dep málim etken edi sottyń baspasóz qyzmeti.

Qaırat Orazbaevtyń mamandyǵy – munaıshy. Ol Atyraý munaı óńdeý zaýytynyń bas dırektory bolǵan.

Al 2020 jylǵy qańtarda Atyraý qalasynyń ákimi bolyp taǵaıyndalǵan. Bul laýazymnan 2022 jylǵy qańtarda bosatylǵan.