Atyraý qalasynyń bir bóligi men úsh aýdannyń aýyldary jaryqsyz qaldy

<p>ATYRAÝ. KAZINFORM &mdash; Atyraý qalasynyń bir bóligi men úsh aýdannyń aýyldarynda jaryq óship qaldy. Jergilikti energetıkter jaryqtyń óshýin Mańǵystaý atom energetıkalyq kombınatyndaǵy aqaýmen baılanystyrdy.</p>

Atyraý oblysynyń energetıkalyq kesheni baspasóz qyzmetiniń málimetine súıensek, elektr 24 qańtarda saǵat 22:14-te sóngen.

«Mańǵystaý atom energetıkalyq kombınatyndaǵy №1 energobloktyń avarııalyq sóndirilýine baılanysty Atyraý jylý-elektr ortalyǵynan elektr tasymaldaıtyn 35 kV jeli ajyratyldy. Sonyń saldarynan Atyraý qalasyndaǵy Balyqshy, Selstroı, SMP-136, Hımposelok, Saýda bazasy, Turǵyn úı qalashyǵy shaǵyn aýdandary men S.Datov kóshesinde jaryq bolmady. Elektr energııasy Mahambet aýdanynda, Inder aýdanynyń Órlik aýyly men Qyzylqoǵa aýdanyndaǵy Mııaly aýylynda da sóndi», -dep habarlady energetıkalyq keshenniń baspasóz qyzmeti.

Jergilikti ýaqytpen saǵat 22:30-da barlyq aýmaqtarǵa elektr kerneýi tolyǵymen iske qosylǵan.

Eske sala ketelik, buǵan deıin Atyraý mańyndaǵy birneshe eldi meken jaryqsyz qalǵanyn habarlaǵan bolatynbyz.