Atyraý qalasy men úsh aýdanda jaryq sónip qaldy

<p>Búgin Atyraý oblysynyń úsh aýdany men qala mańyndaǵy birneshe eldi mekende jaryq sónip qaldy. Jergilikti energetıkter úsh saǵattan keıin jaryqty qalpyna keltirdi, dep <a href="https://kaz.inform.kz/" target="_blank" rel="noopener">Kazinform.&nbsp;</a></p>

Atyraý oblysynyń energetıkalyq kesheni baspasóz qyzmetiniń aqparatyna qaraǵanda, elektr jaryǵy 14 jeltoqsanda saǵat 10:00-de óship qalǵan.

«Mahambet, Inder jáne Qyzylqoǵa aýdanynyń, Atyraý qalasynyń mańyndaǵy Bereke, Vodnıkov, Balyqshy, Kókarna, Tasqala, Shırına eldi mekenderinde, SMP-136, «Turǵyn úı qalashyǵy» shaǵyn aýdandarynda, oblys ortalyǵynyń sol jaǵalaý bóliginiń shaǵyn aýdandarynda elektr energııasy sóndi. Buǵan 35/110kV jelisindegi «SAON» júıelik avtomatıkasy apattyq jaǵdaıda ajyratylǵan. Bul avtomatıka bir nemese birneshe qorektendirý jelisinde júkteme túıininiń turaqtylyǵyn saqtaý úshin jumys isteıdi. Elektr energııasynyń óshýine birneshe sebep áser etken. «KUS» stansasynda generatsııa tómendep, Mańǵystaý energııa torabyna qaraı 220kV tranzıttik jelidegi qýat ulǵaıǵan. Sondaı-aq aýa temperatýrasynyń kúrt tómendeýine baılanysty Atyraý oblysynyń elektr jelilerinde elektr energııasyn tutyný ulǵaıdy. Bul da elektr stantsııasyn generatsııalaýdyń jetispeýshiligine áser etti», - dep habarlady energetıkalyq keshenniń baspasóz qyzmeti.

Túski saǵat 13:00-de Atyraý qalasy men oblys aýdandaryn elektrmen jabdyqtaý tolyǵymen qalpyna keltirildi. Qazir «Atyraý Jaryq» AQ qyzmetkerleri elektr energııasynyń avarııalyq jáne uzaq ýaqyt ajyratylýyn boldyrmaý maqsatynda kúsheıtilgen rejımde jumys isteýge kiristi.

Eske sala ketelik, budan buryn Atyraýdy sýmen qamtý tolyq qalpyna keltirilgenin habarlaǵan edik.