Atyraý dárigerleri júregi toqtap qalǵan 12 jasar qyzdyń ómirin saqtap qaldy

<p>ATYRAÝ. KAZINFORM &ndash; Atyraýda 12 jasar qyzdyń júregi toqtap qalǵan. Jergilikti dárigerler naýqastyń ómirin saqtap qaldy.</p>

Atyraý oblystyq balalar aýrýhanasynyń baspasóz qyzmetinen málim etkendeı, 12 jasar qyz qant dıabetimen aýyrǵan. Naýqas kenetten esinen tanyp, aýrýhanaǵa jedel jetkizilgen. 

«Naýqasqa balalar kardıology Tamılla Maratqyzy holterlik EKG jasap, onda 4 sekýndtan astam 141 eleýli úzilisti anyqtady. Sonymen birge 3-dárejeli AV blokada júrektiń toqtap qalý qaýpi týyndady. Sol sebepten, naýqastyń jaǵdaıy qıyn dep baǵalandy», -dep habarlady aýrýhananyń baspasóz qyzmeti. 

Aýrýhana dárigerleri jasóspirimniń ómirin saqtap qalýǵa keńes alý úshin Astanadaǵy Ulttyq ǵylymı kardıologııa ortalyǵynyń arıtmologtaryna júgingen. Naýqasty sanıtarlyq avıatsııanyń kómegimen elordadaǵy ortalyqqa jetkizý máselesi qozǵaldy. 

«Atyraýdaǵy kardıologııa ortalyǵynda naýqastyń júregindegi oń jaq qarynshaǵa belsendi fıksatsııasy bar turaqty syrtqy kardıostımýlıator ımplantatsııalandy. Otany arıtmolog-dáriger Q.Ispergenov, assıstent-rentgenohırýrg A.Maksımov, reanımatolog T.Lesuly, kardıolog J.Oralbekova, balalar kardıology T.Maratqyzy jasaǵan. Ota sátti ótip, naýqastyń júregine rıtmdi kardıostımýlıator qoıyldy», -dep málim etti aýrýhananyń baspasóz qyzmetinen.

Qazir 12 jasar jasóspirimniń ómirine tónip turǵan qaýip joq.

Eske sala ketelik, budan buryn Atyraýda 3-qabattan qulaǵan 6 jasar balanyń aıaǵyna ota jasalǵanyn habarlaǵan bolatynbyz.