Atyraý dárigerleri aýyr pnevmonııaǵa shaldyqqan náresteni aman alyp qaldy

<p>ATYRAÝ. KAZINFORM &ndash; Atyraý oblysynda 2 aılyq náreste aýyr pnevmonııaǵa shaldyqqan. Naýqas náresteni aýrýhana jetkizý úshin sanavıatsııa shaqyrylǵan.</p>

Atyraý oblystyq Densaýlyq saqtaý basqarmasynyń baspasóz qyzmetinen málim etkendeı, Qyzylqoǵa aýdanyndaǵy Mııaly aýylynda 2 aılyq sábıge aýyr pnevmonııa dıagnozy qoıylǵan.

«Dáriger-reanımatolog Nurmuhanbet Bókenuly sanvıatsııa arqyly Atyraý qalasyndaǵy №2 oblystyq aýrýhanasyna eki aılyq sábıdi jetkizdi. Sol kezde sábıdiń jaǵdaıy óte aýyr boldy. Júrek soǵysynyń jıiligi mınýtyna 210-ǵa deıin jetti. Jalpy normasy 150-ge bolý kerek. Aýrýhana ákimshiligi men reanımatolog mamandar Ana men bala ulttyq ortalyǵymen shuǵyl telemedıtsınalyq keńes uıymdastyrdy. Astana qalasynyń kardıolog mamandarynyń usynysymen shuǵyl túrde elektrlik kardıoversııa jasaldy», - dep habarlady basqarmanyń baspasóz qyzmeti.

Aýrýhananyń bilikti reanımatologtary kardıoversııa protsedýrasy sátti ótkizgen. Sábıdiń júrek soǵysynyń jıiligi qalypqa túsken.

«Qazir sábı jansaqtaý bóliminen jiti respıratorly vırýsty bólimshesine aýystyryldy. Onyń qasynda anasy bar. Jaǵdaıy birqalypty, áli de dárigerlerdiń baqylaýynda bolady», - dep málim etti basqarmanyń baspasóz qyzmetinen.

Eske sala ketelik, buǵan deıin Atyraýda kópqabatty úıdiń terezesinen qulaǵan 3 jasar sábıdiń jaǵdaıy aýyr ekenin jazǵan bolatynbyz.