Atyraý balabaqshalarynda 17 myń balaǵa oryn jetpeı tur
Atyraý qalalyq bilim bóliminiń basshysy Aınagúl Dúısekenovanyń aıtýynsha, endi balasyn kezekke tirkegen ata-analarǵa tórt balabaqshany tańdaý múmkindigi beriledi.
«Qazir Atyraý qalasynda 122 balabaqsha jumys isteıdi. Jyl basynan beri memlekettik 45, jeke ıeliktegi 77 balabaqsha memlekettik tapsyrys alyp otyr. Bul balabaqshalardaǵy tárbıelenýshiler sany — 19 959. Onyń ishinde memlekettik balabaqshalar 11 783 tárbıelenýshige qyzmet kórsetedi. Al, memlekettik tapsyrys alatyn jeke ıeliktegi balabaqshalarǵa 7 823 bala barady. Shahardaǵy 9 shaǵyn ortalyqqa 353 bala baryp júr», -dedi Aınagúl Dúısekenova.
Onyń deregine qaraǵada, memleket-jekemenshik áriptestigi aıasynda 9 balabaqsha qoldanysqa berilgen. Bul balabaqshalardyń árqaısysynda 290 oryn bar.
«Atyraý qalasynda balabaqshanyń kezeginde 17 myń bala tur. Qazir balabaqshanyń kezegine qoıý, qabyldaý protsesi tolyqtaı avtomattandyryldy. Balabaqshalarǵa kezekke turý jáne joldama alýdyń jańa erejesi bar. Soǵan baılanysty birińǵaı kezekke aýystyrý jumysy júrgizilip jatyr. Jańa erejege sáıkes ata-anaǵa birden tórt balabaqshaǵa deıin tańdaýǵa múmkindik beriledi. Sodan soń 1414-ten ózi tańdaǵan balabaqshaǵa kezekke qoıylǵany týraly habarlama kelip, elektrondy joldama beriledi», -dep málim etti Aınagúl Dúısekenova.
Eske sala ketelik, buǵan deıin Atyraý oblysynda jyl basynan beri 6 bala terezeden qulaǵanyn jazǵan edik.