Atyraý ákimdigi aýla abattandyram dep 800 mln teńgeni ysyrap etken — Antıkor

<p>ATYRAÝ. KAZINFORM — Atyraý qalasynyń ákimdigi «100 aýlany abattandyrý» jobasyn iske asyryp jatyr. Alaıda, atalǵan joba aıasynda atqarylǵan jumystan 800 mln teńgeniń kemshiligi anyqtalyp otyr.</p>

Sybaılas jemqorlyqqa qarsy is-qımyl agenttigi Atyraý oblystyq departamentiniń málimetinshe, munaıly shahardyń «Almagúl» shaǵynaýdanyndaǵy aýlalardy abattandyrý jumysy tekserilgen. 

«Sybaılas jemqorlyqqa qarsy eriktiler „Ádildik joly“ RQB Atyraý fılıalynyń ókilderimen birlesip ótken jylǵy kúzden beri qalalyq aýla alańdaryn abattandyrý jobasyn baqylaýǵa aldy. Aı saıyn júrgizilip jatqan jumystyń sapasyna monıtorıng ótkizilip keledi. Bıyl „Almagúl“ shaǵyn aýdanynda „100 aýlany abattandyrý“ jobasyna monıtorıng júrgizilip, 800 mln teńgeden astam qarjynyń buzýshylyǵy anyqtaldy», -dep habarlady departamenttiń baspasóz qyzmeti. 

Máselen, byltyrǵy shildede tósenish tóseý, tamyzda aýla aýmaqtarynyń, trotýarlar men alańdardyń asfaltbeton jabyndary, balalar jáne sport, fýtbol alańdarynyń oramdy jáne jasandy jabyny, qarashada balalar men sport alańdaryn ornatý, rolık tóseý, belgi ornatý úshin aqy tólendi. 

Foto: Atyraý oblysy sybaılas jemqorlyqqa qarsy is-qımyl departamenti

Monıtorıng nátıjesine sáıkes 60 mıllıon teńgeniń jumysy oryndalmasa da, aktilerge zańsyz qol qoıylǵany anyqtaldy. Merdiger oıyn alańyn, sport aımaǵyn ornatyp, asfaltty aýystyrǵan. Alaıda, 1 jáne 3-úıdiń tusyna bordıýr qoımaǵan. Osyǵan uqsas jaǵdaı 7, 8, 9, 14, 15, 16-úılerdiń aýlasynda bar. Tapsyrys berýshi jobalyq-smetalyq qujat ázirleý kezinde mármár oryndyqtar, qoqys jáshigi men men jıektastyń bir jıyntyǵyn 470 myń teńgege baǵalaǵan. Alaıda, prokýratýra bıýdjet qarajatyn únemdeý maqsatynda osy qoqys jáshikteri men oryndyqtardy óńdelgen aǵashtan jasalǵan ári sýǵa tózimdi túrine aýystyrý týraly usynys bergen.

Qadaǵalaý orǵany usynǵan oryndyqtar men qoqys jáshikteriniń baǵasy - shamamen 40-50 myń teńge. Bul - JSQ-da kórsetilgen baǵadan 10 ese arzan. Biraq, ákimdik atalǵan qarjyny únemdeýdiń ornyna 107 temir oryndyq satyp alǵan. Bul oryndyqtardy B. Amanshın kóshesindegi 72 jáne 74-úıdiń aýlasyndaǵy alańǵa ornatqan. Atalǵan mekenjaılardaǵy oıyn alańynda oryndyqsyz karýsel men átkenshekter, qumy joq qumsalǵysh tur. Sańyraýqulaq túrindegi shatyr, shańǵy trenajeri, qoqys jáshikteri joq.

«Abattandyrý boıynsha oryndalmaǵan jumys úshin negizsiz aqy tóleýge bólim basshysynyń zańdy bilmeýi men fýnktsıonaldyq mindetterine josyqsyz qaraýy yqpal etti. Tapsyrys berýshi joba aıasyndaǵy jumystardy kemshilikti túzettermeı qabyldap, paıdalanýǵa berse, qylmystyq jaýapqa tartylady. Al merdiger tapsyrys berýshi aldyndaǵy mindettemelerin oryndamasa, memlekettik satyp alý konkýrsynyń josyqsyz qatysýshysy bolyp tanylady. Qurylys-montajdaý jumysyn oryndamaǵany úshin qurylys-montajdaý jumysyna berilgen lıtsenzııasynan aıyrylyp, ákimshilik jaýapqa tartylady», -dep naqtylady departamenttiń baspasóz qyzmeti.

Eske sala ketelik, buǵan deıin atyraýlyq eriktiler 130 mln teńgeniń negizsiz jumsalýyna jol bermegenin jazǵan edik.